മഞ്ഞിൽ മൂടിയ രാത്രിയിൽ ദൂരെ മലമുകളിൽ തിളങ്ങി നിൽക്കുന്ന നക്ഷത്ര വിളക്ക്. ക്രിസ്മസ് ഓർമകൾക്ക് ആ നക്ഷത്ര വിളക്കിന്റെ തിളക്കമാണ്. ഓരോ മലയിലും രണ്ടോ മൂന്നോ നക്ഷത്രങ്ങൾ മാത്രം മഞ്ഞിൽ മൂടി നിൽക്കുന്ന കാഴ്ച.

മലബാറിലേക്കുള്ള കുടിയേറ്റത്തിന് അധികം പ്രായമായിട്ടില്ല. ഓരോ മലയിലും വളരെക്കുറച്ചു വീടുകൾ മാത്രം. രാത്രിയിൽ വീട്ടുമുറ്റത്തെ നക്ഷത്രങ്ങൾ മാത്രം മഞ്ഞിൽ മൂടി അങ്ങനെ തെളിഞ്ഞു നിൽക്കും. നക്ഷത്രങ്ങളെ നോക്കി ഓരോ വീടും ഏതെന്ന് ഊഹിച്ചെടുക്കും. നക്ഷത്ര വിളക്കുകൾക്കെന്നല്ല, ക്രിസ്മസ് ദിനങ്ങളിൽ എല്ലാ വിളക്കുകൾക്കും എന്തോ ഒരു ഭംഗിക്കൂടുതൽ ഉണ്ടെന്നാണ് എനിക്കു തോന്നിയിട്ടുള്ളത്. പുലർകാല യാത്രകളിൽ ശ്രദ്ധിച്ചിട്ടില്ലേ? മഞ്ഞിൽ മൂടി നിൽക്കുന്ന ട്രാഫിക് സിഗ്നൽ ലൈറ്റുകളും തെരുവു വിളക്കുകളും. എന്തൊരു ഭംഗിയാണവയ്ക്ക്.

കിസ്മസ് രാവുകളിലെ മഞ്ഞിന് ഇത്രമാത്രം കുളിരെന്തേ? നക്ഷത്ര വിളക്കുകൾക്ക് മനസ്സിനെ കൊതിപ്പിക്കാനുള്ള എന്തോ പ്രത്യേക കഴിവുണ്ടോ? എന്തോ? മഞ്ഞും തണുപ്പും നക്ഷത്ര വിളക്കുകളും സാന്താക്ലോസും കാരളും പള്ളിയിൽ രാത്രിയിലെ തിരുപ്പിറവി ചടങ്ങുകളുമെല്ലാം ചേർന്ന് അന്തരീക്ഷത്തിലും മനസ്സിലുമാകെ വർണങ്ങൾ നിറച്ചതുപോലെ. ക്രിസ്മസ് ഓർമകൾക്കു പോലുമുണ്ട് കുളിര്. മഞ്ഞിൽ പൊങ്ങിക്കിടക്കുന്ന ഒരു ബലൂൺ പോലെ മനസ്സും. മനസ്സിൽ തൂങ്ങിക്കിടന്നു കത്തുന്ന ആയിരം നക്ഷത്രവിളക്കുകൾ .

കഴിഞ്ഞ ക്രിസ്മസ് രാത്രിയിൽ കാരളിനൊപ്പം വന്ന സാന്താക്ലോസ് മകൾക്കു കൈ കൊടുത്തു. പിന്നെ കൈനിറയെ മിഠായിയും. അപ്പോൾ അവൾക്കു സംശയം. ഈ ക്രിസ്മസ് അപ്പൂപ്പന്റെ വീടെവിടെയാ? അവൾക്കങ്ങനെയാണ്, സംശയങ്ങൾ തീരുകയേയില്ല. ഓണത്തിന്റന്നും ഉണ്ടായി അവളുടെ വക തമാശ. രാവിലെ എഴുന്നേറ്റു വന്നതേ അന്വേഷിച്ചത് ഓണത്തപ്പൻ വന്നോ എന്ന്. നീ ഉറങ്ങിക്കിടന്നപ്പോൾ വന്നു പോയി എന്ന് ചേച്ചിയുടെ വക കുന്നായ്മയും. പിന്നത്തെ പൊല്ലാപ്പും കരച്ചിലും തീർക്കാൻ ഏറെ സമയമെടുത്തു. ക്ലാസിൽ ടീച്ചർ അവളോടു പറഞ്ഞിരുന്നത്രെ, തിരുവോണ നാളിൽ ഓണത്തപ്പൻ നമ്മളെയൊക്കെ കാണാൻ വരുമെന്ന്.

സാന്താക്ലോസിന്റെ വീടന്വേഷിച്ച മകൾക്കുണ്ടായ സംശയത്തേക്കാളും ഏറെ സംശയങ്ങൾ എന്റെ ബാല്യത്തിനും ഉണ്ടായിരുന്നല്ലോ. നന്നേ ചെറുപ്പത്തിലെ പ്രധാന സംശയം നക്ഷത്ര വിളക്കുകളെക്കുറിച്ചായിരുന്നു. നക്ഷത്രങ്ങൾ ആകാശത്തല്ലേ ഉണ്ടാവുക. വീടുകളുടെയും കടകളുടെയും മുന്നിൽ ഈ നക്ഷത്ര വിളക്കുകൾ എങ്ങനെ വരുന്നു. ഏങ്ങനെയാണീ വിളക്കുകൾ രാത്രിയിൽ തിളങ്ങുന്നത്. മിന്നാമിന്നുകൾ തിളങ്ങുന്നുണ്ടല്ലോ? അതുപോലെ എന്തെങ്കിലും രഹസ്യം നക്ഷത്രങ്ങൾക്കു പിന്നിലും ഉണ്ടാവും എന്ന ഉത്തരമാണ് എന്റെ കുരുന്നു മനസ്സ് കണ്ടെത്തിയത്.

നക്ഷത്രത്തിളക്കത്തിന്റെ രഹസ്യം കണ്ടുപിടിച്ചപ്പോഴും മറ്റൊരു രഹസ്യം മനസ്സിൽ അനാവരണം ചെയ്യപ്പെടാതെ കിടന്നു. പള്ളിയിലെ തിരപ്പിറവി ചടങ്ങുകളുമായി ബന്ധപ്പെട്ടതായിരുന്നു അത്. പുൽക്കൂട്ടിൽ ഉണ്ണിയെ കൊണ്ടു വച്ചാൽ ഉടൻ ഒരു നക്ഷത്രം തനിയെ ഉദിക്കുകയായി. പിന്നെ അത് തനിയെ നീങ്ങി പുൽക്കൂടിനു മുകളിലെത്തി നിൽക്കുന്നു. ആട്ടിടയൻമാർക്ക് വഴികാട്ടിയ നക്ഷത്രം പക്ഷേ എന്റെ ബാല്യം തേടിയ ഉത്തരങ്ങൾക്കു മുന്നിൽ ഏറെക്കാലം വഴിയടഞ്ഞു നിന്നു.

ഓടക്കാലുകൾ വെട്ടിച്ചീകി കൂട്ടിക്കെട്ടിയാണ് നക്ഷത്രമുണ്ടാക്കുക. അതിൽ വർണക്കടലാസുകൾ ചുറ്റും. ഉള്ളിൽ ഒരു ബാറ്ററി വിളക്കും. പച്ചയും മഞ്ഞയും ചുവപ്പുമൊക്കെയായി ചുറ്റും വർണങ്ങൾ വിതറി രാത്രിയിൽ അതങ്ങനെ തിളങ്ങി നിനിൽക്കും. നക്ഷത്രമുണ്ടാക്കാൻ എല്ലാവർക്കുമറിയില്ല. നക്ഷത്രത്തിന്റെ സാങ്കേതിക വിദ്യ അറിയാവുന്നവരുടെ കൊയ്ത്തുകാലമാണ്. അന്നത്തെ ഓടക്കാൽ നക്ഷത്രങ്ങളുടെ ഭംഗിക്കടുത്തെത്താൻ വിപണിയിൽ കാലാകാലങ്ങളിൽ അവതരിച്ച നക്ഷത്രങ്ങൾങ്ങൾക്കൊന്നും കഴിഞ്ഞിട്ടില്ലെന്നാണ് എന്റെ വിശ്വാസം.

കൊന്നക്കമ്പുകൾ കൊണ്ടു തീർക്കുന്ന കുഞ്ഞു പുൽക്കൂട്. അതിൽ കപ്പത്തണ്ടിന്റെ ഉള്ളിലെ പൊങ്ങ് കുത്തിയെടുത്ത് കളർ ചേർത്ത് നൂലിൽ കോർത്തിടുന്ന അലങ്കാരങ്ങൾ. ആഡംബരം ചാർത്താനായി, ബന്ധുക്കളുടെ വക പോസ്റ്റിൽ എത്തുന്ന ക്രിസ്മസ് ആശംസാ കാർഡുകളും നിരത്തും. ബേദ്ലഹേമിലെ പുൽക്കൂടിനേക്കാൾ ലളിതം.

രാത്രി കാരൾ സംഘങ്ങളുടെ കൊട്ടിപ്പാടിയുള്ള വരവ്. ക്രിസ്ത്യൻ വിഭാഗങ്ങളുടെ വക രണ്ടോ മൂന്നോ സംഘങ്ങൾ. പിന്നെ ക്ലബ്വുകളുടെയും സൗഹൃദ കൂട്ടായമ്കളുടെയുമൊക്കെ പേരിൽ. കാരളുകൾ എത്തിത്തീരുമ്പോഴേക്കും പള്ളിയിലേക്ക്. പാതിരാക്കുർബാനയ്ക്ക്. മഞ്ഞിൽ മൂടി നിൽക്കുന്ന വഴിയിൽ നക്ഷത്ര വിളക്കുകൾക്കിടയിലൂടെ.

കാലം വഴിയോരങ്ങളെ മിന്നിത്തെളിയുന്ന വൈദ്യുതി ദീപങ്ങൾകൊണ്ടലങ്കരിച്ചു. നിരനിരയായി ഓടിക്കത്തുന്ന നക്ഷത്ര വർണങ്ങൾ നിറച്ചു. പക്ഷേ, മനസ്സിലിപ്പോഴും ഓടക്കാലുകൾകൊണ്ടുണ്ടാക്കിയ ആ നക്ഷത്ര വിളക്കുകളാണ്. മനസ്സിൽ നിറയുന്നത് ആ നക്ഷത്രത്തിൽ നിന്നുള്ള വെളിച്ചമാണ്.

ഡിസംബർ. ആർദ്രമായൊരു ഇൗണം ഓരോ രാവിലും ഒളിപ്പിച്ചുവച്ച മാസം.
മഞ്ഞിലും മനസ്സിലും നിറഞ്ഞ്, ഉയർന്നുചെന്ന് ക്രിസ്മസ് താരങ്ങളെ തൊടുന്നുവല്ലോ ആ ഈണം...

പാതിരാക്കുർബാനയുടെ നനുത്ത സംഗീതത്തിന്റെയും കാരൾ സംഘങ്ങളുടെ ബാന്റു മുഴക്കത്തിന്റെയും ഇൗണം നിറയുന്ന രാത്രികൾ. നൊസ്റ്റാൾജിയ എന്ന ക്ലീഷേ തന്നെ ഉപയോഗിച്ച് ഓർമകളെ റീവൈൻഡ് ചെയ്തെടുത്താൽ ആ ഇൗണങ്ങളെ ഇപ്പോഴും കേൾക്കാം. തണുപ്പുള്ള രാത്രികളിൽ അടഞ്ഞു പോകുന്ന കണ്ണുകൾ ബലമായി പിടിച്ചു നിർത്തി, മൂടിപ്പുതച്ചു കിടന്നുറങ്ങാനുള്ള ആഗ്രഹത്തിനും മേലയായി കാരൾ സംഘങ്ങളുടെ പാട്ടുകൾ ആവേശമായി നിറഞ്ഞുനിന്ന ഒരു കാലമുണ്ട്.

പുൽക്കൂടിനും നക്ഷത്രവിളക്കുകൾക്കുമിടയിൽ അവരുടെ പാട്ടുകൾക്കും മേളത്തിനും കാതോർത്തിരിക്കുന്ന കാലം. കാരൾ സംഘത്തിന്റെ പാട്ടുശബ്ദം അടുത്തടുത്തു വരുമ്പോൾ വീടിനു മുന്നിലേക്കോടും. ‘ജിങ്കിൾ ബെൽസ് ജിങ്കിൾ ബെൽസ് അങ്കിൾ സാന്താക്ലോസ് കം..... കം.... ’ വർഷങ്ങളെത്ര കഴിഞ്ഞാലും ഭ്രമിപ്പിക്കുകയും മോഹിപ്പിക്കുകയും ചെയ്യുന്ന അതേ പാട്ട്.

മധുര നാരങ്ങാമിഠായി അലിഞ്ഞില്ലാതാകുമ്പോഴും ഓർമ ശേഷിപ്പിക്കുന്ന മൃദുമധുരംപോലെ, മേളങ്ങൾ തീർന്നു സാന്താക്ലോസും സംഘവും പടിയിറങ്ങുമ്പോഴുള്ള നഷ്ടബോധം ഇപ്പോഴും മഞ്ഞിനീണമുള്ള നുറുങ്ങു പാട്ടുശകലങ്ങളായി മനസ്സിൽ. യഹൂദയായിലെ ഒരു ഗ്രാമത്തിലും.....ശാന്തരാത്രി തിരു രാത്രിയും പാടി ശബ്ദാഘോഷം അടുത്ത വീട്ടിലേക്കു പോകും. പിന്നെ ദൂരെ നേർത്തില്ലാതാകും. ശാന്തവും സുന്ദരവുമായ ആ രാത്രി മാത്രം ശേഷിക്കും...പിന്നെ കാത്തിരിപ്പാണ്. വീണ്ടും അവരെത്തുമെന്നുള്ള കാത്തിരിപ്പ്.

സമയം തെറ്റുന്നതിനു മുൻപു പാതിരാക്കുർബാനയ്ക്കെത്താൻ ഇടവഴിയിലൂടെ ഓടുമ്പോൾ മഞ്ഞിനും കിതപ്പിനുമിടയിൽ സൗമ്യമായ ഇൗണങ്ങളുള്ള പാട്ട് പള്ളിയിൽ നിന്ന് ഒഴുകിയെത്തും. ഡിസംബർ തുടങ്ങുമ്പോഴേ പള്ളിയിൽ ക്വയർ സംഘത്തിന്റെ പരിശീലനം ആരംഭിക്കും. പിന്നെ ക്രിസ്മസ് അടുക്കുമ്പോൾ രാവും പകലുമായി പരിശീലത്തിന്റെ ആവേശം പള്ളിയിൽ നിറയും.

പാതിരാക്കുർബാനയുടെ എല്ലാപ്പാട്ടുകളും പുൽക്കൂട്ടിലെ ഉണ്ണിയേശുവിനായി തൂവലുപോലെ സൗമ്യമായ ഇൗണത്തിൽ പാടുന്നു. ‘കാവൽ മാലഖമാരോട് കണ്ണടയ്ക്കരുതേ താഴെ പുൽത്തൊട്ടിയിൽ രാജരാജൻ മയങ്ങുന്നു’ എന്നു പാടി പൈതലാം യേശുവിനെ ഉമ്മവച്ചുണർത്തുന്ന പാട്ടുകൾ. കാലത്തിന്റെ കാതിൽ സ്നേഹം എന്നോ മുതൽപാടുന്ന ഉണർത്തുപാട്ടുകൾ.

ചില പാട്ടോർമകൾ ചില നേരങ്ങളിൽ ഒരുപോലെ സങ്കടവും സന്തോഷവും തോന്നിപ്പിക്കുന്നത് എന്തുകൊണ്ടാവാം?
കേട്ട പാട്ടുകൾ മധുരതരം, കേൾക്കാത്തവ അതിമധുരതരമെന്നു പറയാറില്ലേ?? ഇല്ല.. കേട്ട പാട്ടുകൾ തന്നെയാണ് അതിമധുരതരം.
ഓർമകളുടെ നനുത്ത സ്പർശമുള്ള ഇൗ ക്രിസ്മസ് പാട്ടുകൾ ഇനിയെത്ര ഡിസംബർ രാത്രികളിൽ കേട്ടാലും മതി വരില്ല. ഇനിയൊരു ക്രിസ്മസ് ഇൗണത്തിനു വേണ്ടി കാതോർത്തിരിക്കുന്ന കുട്ടിക്കാലം ഉണ്ടാകില്ലെങ്കിലും ഓരോ വർഷവും ഓർമപ്പെടുത്തലുകളായി ആ മധുര സംഗീതം ആവർത്തിക്കുമെന്ന പ്രതീക്ഷ തന്നെ, ഉണ്ണിയേശുവിന്റെ ജനനം പോലെ, എത്ര സൗമ്യവും ദീപ്തവും.

ശരിയായിരിക്കും.
ക്രിസ്മസ്, സംഗീതവുമാണ്.

മലയാള സിനിമയുടെ വലിയ ബിസിനസ് കാലങ്ങളിലൊന്നാണ് ക്രിസ്മസ്. വമ്പന്‍ റിലീസുകള്‍ എല്ലാ ക്രിസ്മസ് കാലത്തും ഉണ്ടാകാറുണ്ട്. ഇത്തവണയും പതിവുപോലെ തന്നെ.

മമ്മൂട്ടിയുടെ മാസ്റ്റര്‍പീസ്, പൃഥ്വിരാജിന്റെ വിമാനം, ജയസൂര്യയുടെ ആട് 2, ടൊവിനോ തോമസിന്റെ മായാനദി, വിനീതിന്റെ ആന അലറലോടലറല്‍ എന്നിവയാണ് ക്രിസ്മസിന് പുറത്തിറങ്ങുന്ന മലയാളസിനിമകൾ.

മാസ്റ്റർപീസ്

രാജാധിരാജയ്ക്ക് ശേഷം അജയ് വാസുദേവ് സംവിധാനം ചെയ്യുന്ന മമ്മൂട്ടി ചിത്രമാണ് മാസ്റ്റർപീസ്. നൂറു കോടി ക്ലബിൽ ഇടം നേടിയ പുലിമുരുകന് ശേഷം സൂപ്പർ തിരക്കഥാകൃത്ത് ഉദയകൃഷ്ണ രചന നിർവഹിക്കുന്നു. മാസ്റ്റർ ഓഫ് മാസസ് എന്നാണ് സിനിമയുടെ ടാഗ്‌ലൈൻ.

കാംപസ് പശ്ചാത്തലത്തിലുള്ള കഥ പറയുന്ന ചിത്രത്തിൽ കൊളേജ് പ്രൊഫസറായി മമ്മൂട്ടി എത്തുന്നത്. സ്റ്റൈലിഷ് ഗെറ്റപ്പിൽ എഡ്ഡി എന്ന കഥാപാത്രത്തെയാണ് മമ്മൂട്ടി അവതരിപ്പിക്കുന്നത്. എഡ്വേര്‍ഡ് ലിവിംഗ്സ്റ്റണ്‍ എന്നാണ് മുഴുവൻ പേര്.

ഭവാനി ദുര്‍ഗ എന്ന ഐ പി എസ് ഉദ്യോഗസ്ഥയായി വരലക്ഷ്മി അഭിനയിക്കുന്ന ചിത്രത്തില്‍ ഉണ്ണി മുകുന്ദനും ഒരു പൊലീസ് ഉദ്യോഗസ്ഥനായി എത്തുന്നു. പൂനം ബജ്‌വ ഈ ചിത്രത്തില്‍ കോളജ് പ്രൊഫസറായി എത്തുന്നു. സന്തോഷ് പണ്ഡിറ്റും ചിത്രത്തിലുണ്ട്. ഗോകുൽസുരേഷ് ഗോപി, മുകേഷ്, മഖ്ബൂൽ സൽമാൻ, സിജു ജോൺ, പാഷാണം ഷാജി, ബിജു കുട്ടൻ, അർജുൻ, അശ്വിൻ, ജോഗി, ദിവ്യദർശൻ, അജ്മൽ നിയാസ്, സുനിൽ സുഗദ, കൈലാഷ്, കലാഭവൻ ഷാജോൺ, ഗണേഷ് കുമാർ, ക്യാപ്റ്റൻ രാജു, ശിവജി ഗുരുവായൂർ,മഹിമ നമ്പ്യാർ തുടങ്ങി വൻതാരനിരയാണ് ചിത്രത്തിൽ അണിനിരക്കുന്നത്. വിനോദ് ഇല്ലംപിള്ളിയാണ് ഛായാഗ്രഹണം.

ബിഗ് ബജറ്റ് ചിത്രം റോയൽ സിനിമാസിന്റെ ബാനറിൽ മുൻ പ്രവാസിയായ സി.എച്ച്.മുഹമ്മദ് കോടികൾ ചെലവിട്ട് നിർമിക്കുന്നു. റോയൽ സിനിമാസിന്റെ ആദ്യ ചിത്രമാണിത്.

വിമാനം

പൃഥ്വിരാജിനെ നായകനാക്കി നവാഗതനായ പ്രദീപ് എം.നായര്‍ സംവിധാനം ചെയ്യുന്ന 'വിമാനം' ക്രിസ്മസ് റിലീസ് ആണ്. തൊടുപുഴ സ്വദേശിയായ സജിയുടെ ജീവിതത്തെ അടിസ്ഥാനമാക്കിയുള്ളതാണ് ചിത്രം. ബധിരനും മൂകനുമായ സജി സ്വന്തമായി ഒരു വിമാനം നിര്‍മ്മിച്ച് പറത്തിയിരുന്നു. വ്യത്യസ്തമായ വേഷപ്പകര്‍ച്ചയാണ് ചിത്രത്തില്‍ പൃഥ്വിരാജിന്. ഈ കഥാപാത്രത്തിന് വേണ്ടി താരം പത്ത് കിലോയോളം ഭാരം കുറച്ചിരുന്നു. പുതുമുഖം ദുര്‍ഗ കൃഷ്ണയാണ് വിമാനത്തില്‍ പൃഥ്വിയുടെ നായിക.

മാജിക് ഫ്രെയിംസിന്റെ ബാനറില്‍ ലിസ്റ്റിന്‍ സ്റ്റീഫനാണ് ചിത്രം നിര്‍മിക്കുന്നത്. അലന്‍സിയര്‍ ലെ ലോപ്പസ്, സുധീര്‍ കരമന, പി ബാലചന്ദ്രന്‍ തുടങ്ങിയവരാണ് സിനിമയിലെ മറ്റു പ്രധാന താരങ്ങള്‍.

ആട് 2

തിയറ്ററുകൾ പൂരപ്പറമ്പാക്കാൻ ഷാജി പാപ്പനും കൂട്ടരും വീണ്ടുമെത്തുന്നു. ആട് ഒരു ഭീകരജീവിയാണ് എന്ന ചിത്രം റിലീസ് ചെയ്ത് രണ്ട് വർഷം പിന്നിടുമ്പോഴാണ് സിനിമയുടെ രണ്ടാം ഭാഗം എത്തുന്നത്. 2015 ഫെബ്രുവരി ആറിനാണ് ആടിന്റെ ആദ്യഭാഗം തിയറ്ററുകളിലെത്തിയത്.

കോമഡിയ്ക്കാണ് പ്രാധാന്യമെങ്കിലും മാസ് ആക്​ഷൻ രംഗങ്ങളായിരിക്കും ആട് 2വിന്റെ പ്രത്യേകതയെന്ന് സംവിധായകന്‍ മിഥുൻ മനോരമ ഓൺലൈനോട് പറഞ്ഞു. ആടിന്റെ ആദ്യ ഭാഗത്തെ കഥാപാത്രങ്ങളിൽ പലരും രണ്ടാം ഭാഗത്തിലുണ്ടാകും. ഷാൻ റഹ്മാൻ തന്നെയാണ് സംഗീതം. വിജയ് ബാബുവിന്റെ ഉടമസ്ഥതയിലുള്ള ഫ്രൈഡേ ഫിലിംസ് ആണ് നിർമാണം.

മായാനദി

ടൊവിനോ തോമസിനെ നായകനാക്കി ആഷിക് അബു സംവിധാനം ചെയ്യുന്ന ചിത്രമാണ് 'മായാനദി'. അമൽ നീരദിന്റേതാണ് കഥ. ശ്യാം പുഷ്ക്കറും ദിലീഷ് നായരും ചേർന്ന് തിരക്കഥ എഴുതുന്നു. ഐശ്വര്യ ലക്ഷ്മിയാണ് നായിക.

സംവിധായകരായ ലിജോ ജോസ് പല്ലിശ്ശേരി, ബേസിൽ ജോസഫ്, ഖാലിദ് റഹ്മാൻ(അനുരാഗ കരിക്കിൻവെള്ളം) എന്നിവർക്കൊപ്പം അപർണ ബാലമുരളി, ഉണ്ണിമായ, നിഴൽകൾ രവി, സൗബിൻ സാഹിർ, ഹരിഷ് ഉത്തമൻ തുടങ്ങി വലിയൊരു താരനിര തന്നെ ചിത്രത്തിൽ അണിനിരക്കുന്നുണ്ട്.

റെക്സ് വിജയന്റേതാണ് സംഗീതം. ഛായാഗ്രഹണം ജയേഷ് മോഹൻ. വസ്ത്രാലങ്കാരം സമീറ സനീഷ്. ഒപിഎം പ്രൊഡക്ഷൻസിന്റെ ബാനറിൽ ആഷിക് അബു തന്നെയാണ് നിർമാണം.

ആന അലറലോടലറൽ

വിനീത് ശ്രീനിവാസന്‍, അനുസിത്താര എന്നിവരെ പ്രധാന കഥാപാത്രങ്ങളാക്കി നവാഗതനായ ദിലീപ് മേനോൻ സംവിധാനം ചെയ്യുന്ന ചിത്രമാണ് ആന അലറലോടലറൽ. സുരാജ് വെഞ്ഞാറമൂട്, ഇന്നസെന്റ്, ഇന്ദ്രന്‍സ്, ഹരീഷ് കണാരന്‍, മാമുക്കോയ, വിനോദ് കെടാമംഗലം, ആനന്ദം ഫെയിം വിശാഖ്, അപ്പുണ്ണി ശശി, തെസ്നിഖാന്‍ എന്നിവരാണ് മറ്റുതാരങ്ങൾ. ശരത്ബാലന്‍ തിരക്കഥ, സംഭാഷണമെഴുതുന്ന ഈ ചിത്രത്തിന്റെ ഛായാഗ്രഹണം ദീപു എസ്. ഉണ്ണി നിര്‍വഹിക്കുന്നു.

റിന്റു

തീയേറ്ററിൽ പ്രേഷകർ കൈവിട്ട ഒരു ചിത്രം ടോറന്റിലും ടിവിയിലും വൻ ഹിറ്റാവുന്നു. ഡിവിഡികള്‍ ചൂടപ്പം പോലെ വിറ്റുപോകുന്നു. അതിലെ കഥാപാത്രങ്ങളെ യുവത്വം ഏറ്റെടുത്ത് കൂടെ കൂട്ടുന്നു. മിഥുൻ മാനുവൽ തോമസിന്റെ സംവിധാനത്തിൽ 2015 ഫെബ്രുവരിയിൽ പുറത്തിറങ്ങിയ ആട്: ഒരു ഭീകരജീവിയാണ് അഥവാ ആട് എന്ന ചിത്രത്തെകുറിച്ചാണ് പറഞ്ഞു വരുന്നത്. തിയറ്റർ വിട്ടതിനു ശേഷം പ്രേഷകർ ഏറ്റെടുത്ത ചിത്രം. ഇപ്പോള്‍ ഷാജിപാപ്പനും ടീമും വീണ്ടും എത്തുകയാണ് പ്രേഷകരെ തേടി.. തിയറ്ററിൽ പരാജയപ്പെട്ട ഒരു ചിത്രത്തിന്റെ രണ്ടാം ഭാഗം എന്നത് ചരിത്രത്തിൽ തന്നെ അപൂർവം. തിയറ്റർ പുറത്തും സിനിമയ്ക്കിടമുണ്ടെന്നു തെളിയിച്ച ഷാജിപാപ്പനും കൂട്ടരും ക്രിസ്മസ് ആഘോഷിക്കാൻ വീണ്ടുമെത്തുമ്പോൾ സംവിധായകൻ മിധുൻ മാനുവൽ തോമസിന് പറയാനുള്ളത്–

∙ ഷാജി പാപ്പന്റെ വിജയം.
ഷാജി പാപ്പൻ ട്രെൻഡ് തന്നെയാണ് ആട് എന്ന സിനിമയുടെ രണ്ടാം ഭാഗത്തിലേയ്ക്ക് നയിച്ചത്. ടോറന്റിലും ടിവിയിലും എത്തിയ ശേഷം ചിത്രത്തിനുണ്ടായ ജനപ്രീതി തന്നെയാണ് ഈ രണ്ടാം വരവിനു കാരണം.

∙ ആട് 2 പോസ്റ്ററിൽ ആടിനെ കാണാനില്ല
ആട് 2 വിലും ആടൊരു കഥാപാത്രം തന്നെ. ഷാജിപാപ്പനും കൂട്ടർക്കുമൊപ്പം ആടുണ്ട്. എന്നാൽ ഇത്തവണ ആട് ഒരു പ്രധാന കഥാപാത്രം അല്ല. അതാണ് പോസ്റ്ററിൽ കാണാത്തത്.

∙ ആട് പഠിപ്പിച്ച പാഠങ്ങൾ
ആടിന്റെ ആദ്യ ഭാഗത്തിൽ നിന്ന് പാഠങ്ങൾ ഉൾക്കൊണ്ട് അപാകതകൾ പരിഹരിച്ചാണ് ആട് 2 ഒരുങ്ങുന്നത്. ആട് ആദ്യഭാഗത്തിലെ മൾട്ടിപ്പിൾ നറേഷൻ രീതിയും എഡിറ്റിങും ഒക്കെ പ്രേഷകരിൽ ചെറിയ തോതിൽ ആശയകുഴപ്പങ്ങൾ സൃഷ്ടിച്ചിരിക്കാം. പിന്നെ പൂർണ്ണമായും ഒരു പൊളിറ്റിക്കൽ സറ്റയറായിരുന്നു ആദ്യ മൂവി. എന്നാൽ ആട് 2 ഇതിൽ നിന്നും വ്യത്യസ്ഥമായ ഒരനുഭവമായിരിക്കും പ്രേഷകനു സമ്മാനിക്കുക. ഷാജിപാപ്പന്റെയും കൂട്ടരുടെയും അടിസ്ഥാന സ്വഭാവങ്ങൾക്ക് ആട് 2 വിലും മാറ്റങ്ങളുണ്ടാവില്ല. രസചരടുപ്പൊട്ടാതെ എല്ലാപ്രേഷകർക്കും ഒരുപോലെ ആസ്വദിക്കാൻ കഴിയുന്ന ഒരു ഫുൾടൈം എന്റർടൈമെന്റ് ആയിരിക്കും ആട് 2.

∙തിയറ്ററുകളിൽ ശ്രദ്ധിക്കപ്പെടാതെ പോയ സിനിമയുടെ രണ്ടാം ഭാഗം വരുമ്പോൾ?
പ്രേഷകരുടെ താൽപര്യങ്ങളെന്ത്? അവരെന്തു തള്ളും എന്തുകൊള്ളും എന്നൊന്നും മുൻകൂട്ടി പ്രവചിക്കുക സാധ്യമല്ല. തിയറ്ററുകളിൽ ശ്രദ്ധിക്കപ്പെടാതെ പോയ ഒരു മൂവിയുടെ രണ്ടാം ഭാഗം എന്നത് ലോക സിനിമ ചരിത്രത്തിൽ തന്നെ അപൂർവമാണ്. ആട് ആദ്യഭാഗം തീയേറ്ററിൽ ഒരു പരാജയമായിരുന്നു. എന്നാൽ ആ സിനിമ ഒരു പരാജയം ആയിരുന്നു എന്നു പറയാൻ കഴിയില്ല. ചെറിയൊരു ഇടവേളയ്ക്കു ശേഷം പ്രേഷകർ ആടിെന ഏറ്റെടുത്തു. അത് ടോറന്റിലും ടിവിയിലും ഹിറ്റായി... ആ സിനിമയും അതിന്റെ അവതരണ രീതിയുമൊക്കെയായി പൊരുത്തപ്പെട്ടുവരാൻ ഒരു പക്ഷേ, പ്രേഷകർക്ക് അത്രയും സമയം ആവശ്യമായിരുന്നിരിക്കാം.

∙ നായിക പിങ്കി ഷാജി പാപ്പന്റെ നായികയാണോ?
ഒരു കൂട്ടം മണ്ടന്മാരുടെ കഥയാണ് ആട്. അവർക്കു തന്നെയാവും കഥയിൽ പ്രധാന്യം. നായിക പിങ്കി സിനിമ എത്തും വരെ ഒരു സസ്പൻസായി തന്നെ നിലനിൽക്കട്ടെ!

∙ കോമഡിയാണോ പക്കാ ആക്ഷൻ സിനിമയാണോ?
ആട് ഒന്നാം ഭാഗത്തിന്റെ അതേ അവതരണരീതി തന്നെയായിരിക്കും ആട് 2 നും.

∙ പുതിയ കഥാപാത്രങ്ങൾ
ഷാജി പാപ്പനു തുല്യം ഷാജി പാപ്പൻ മാത്രം. എങ്കിലും വ്യത്യസ്ഥരായ ചില കഥാപാത്രങ്ങൾ കൂടി പുതിയ സിനിമയിൽ ഉണ്ടാകും.

∙ ഷാൻ റഹ്മാന്റെ ഇടിവെട്ട് മ്യൂസിക്
ആദ്യ സിനിമയിൽ ഷാൻ തുടങ്ങിവെച്ച സംഗീതത്തിന്റെ ഒരു വിപുലീകരണം ആട് 2 വിൽ പ്രേഷകന് പ്രതീക്ഷിക്കാം.

നിജു ആൻ ഫിലിപ്പ്

നക്ഷത്രവിളക്കുകൾ കണ്ണ് തുറന്ന് പുഞ്ചിരിച്ചുകൊണ്ട് ഓരോ വീടിന്റെ തുഞ്ചത്തും തൂങ്ങിത്തുടങ്ങുമ്പോൾ എന്റെ ഓർമ്മകളിൽ ക്രിസ്തുമസ് കൂടുതൽ ദീപ്തമാകുന്നു.ആകാശം നിറയെ വെളിച്ചപ്പൊട്ടുകൾ വാരി വിതറി ഡിസംബർ രാത്രികൾ അണിഞ്ഞൊരുങ്ങി നിൽപ്പുണ്ടാവും.മുറ്റത്തെ ചാമ്പമരത്തിന്റെ ഉയർന്ന കൊമ്പിൽ മിന്നിയും തെളിഞ്ഞും രണ്ടു വലിയ നക്ഷത്രങ്ങൾ അപ്പ തൂക്കിയിട്ടുണ്ടാവും. ഇടയ്ക്കിടെ കണ്ണടച്ചും തുറന്നും അവരങ്ങനെ ചിരിച്ചു നിൽക്കും. ചുറ്റുപാടും വെളിച്ചം വിതച്ച് ഇലക്ട്രിക് ബൾബുകൾ സ്വയം ചുവന്നും പച്ചച്ചും നീലിച്ചും തണുപ്പിൽ വിറങ്ങലിച്ചു വിളങ്ങും. മിന്നാമിനുങ്ങുകൾ പോലെ വീടിന് അലങ്കാരമായി അവയിങ്ങനെ മുനിഞ്ഞു കത്തും.

ക്രിസ്തുമസ് അവധിക്ക് സ്കൂൾ പൂട്ടിയാൽ സൈക്കിളിൽ ഒരു കറക്കമുണ്ട്. കാടായ കാടും മേടായമേടും സൈക്കിളിൽ പറന്നു പായും. ചൂളമരമുള്ള പറമ്പു നോക്കി വെക്കും.
ചൂളമരം കണ്ടു വെച്ചാൽ ആഘോഷമായി അതു വെട്ടിക്കൊണ്ടു വരാൻ ഒരു പോക്കുണ്ട്. കൂട്ടത്തിൽ മൂത്തവർ കണ്ടു വച്ച മരം മുറിക്കാൻ പാഞ്ഞു കയറും. വെട്ടി തുടങ്ങും മുൻപ് തുഞ്ചത്തു കയറു കെട്ടി ഒരറ്റം താഴെ നിൽക്കുന്ന ഞങ്ങൾക്ക് പിടിക്കാൻ തരും. വെട്ടി നിലത്തു വീഴാതെ ചായ്ച്ചിറക്കും. പിന്നെ,പാട്ടൊക്കെ പാടി തുള്ളിക്കളിച്ചു ചൂളമരക്കൊമ്പിനെ വീട്ടിലെത്തിക്കും. മരം ഒരുക്കലാണ് പിന്നെ. വർണ്ണ ബലൂണുകൾ വീർപ്പിച്ചും തോരണങ്ങൾ തൂക്കിയും പഞ്ഞി കലാപരമായി ഒട്ടിച്ചും ക്രിസ്മസ് മരം നിറയ്ക്കും. തുഞ്ചത്തു മുട്ടക്കാട്ടൻ നക്ഷത്രം; മുളകൊണ്ടുണ്ടാക്കി വർണ്ണക്കടലാസ് ഒട്ടിച്ചു തൂക്കും. അപ്പോൾ കണ്ടാൽ മഞ്ഞണിഞ്ഞു നിൽക്കുന്ന അലങ്കരിച്ച മരമെന്നേ തോന്നൂ. അക്കൊല്ലം മുഴുവൻ കുടുക്കയിൽ സൂക്ഷിച്ചു വെച്ച മുഴുവൻ സമ്പാദ്യവും ഞങ്ങൾ ഇതിനൊക്കെയാണ് വിനിയോഗിക്കുക

തടിക്കഷ്ണങ്ങളും പുല്ലും വൈക്കോലും ഇട്ട് കളിമൺ രൂപങ്ങളും നിറച്ചു പുൽക്കൂട് കൂടി തയാറാക്കിയാൽ ഒരുക്കങ്ങൾ ഏതാണ്ട് പൂർത്തിയായി. പുൽക്കൂടിന്റെ മേൽക്കൂര ചാണകം മെഴുകി മണ്ണിട്ട് തിന പാകി വെയ്ക്കും ദിവസങ്ങൾക്ക് മുൻപേ. ക്രിസ്തുമസ് തലേന്ന് ആകുമ്പോഴേക്കും തിന വളർന്ന് ഭംഗിയിൽ നിൽപ്പുണ്ടാവും.

ഏതാണ്ട് രണ്ടാഴ്ച മുൻപേ കേക്കുണ്ടാക്കാൻ അമ്മച്ചി ഉണക്കപ്പഴങ്ങൾ അരിഞ്ഞു ബ്രാണ്ടിയിൽ കുതിർത്തു വെയ്ക്കും. ഒപ്പം കറുവാപട്ടയും ഗ്രാമ്പൂവും. കേക്കിന്‌ കുഴയ്ക്കുന്ന കൈ നക്കാൻ ഞങ്ങൾ അടികൂടും. അടി കട്ടിയുള്ള അലൂമിനിയം പാത്രത്തിൽ ചെറിയ തീയിൽ കേക്ക് ചുട്ടെടുക്കും. ക്രിസ്തുമസ് എന്നോർക്കുമ്പോഴേ വെന്തു വരുന്ന വായിലിട്ടാൽ അലിയുന്ന കേക്കിന്റെ മണം വന്നു തള്ളുന്നു. ക്രിസ്മസ് തലേന്ന് കപ്പി കാച്ചി കള്ള് ചേർത്തു വെള്ളയപ്പത്തിനു കുഴച്ചു വെയ്ക്കും. ഒരുപാടു തേങ്ങ ചേർത്തു പുളിപ്പിച്ചു ചുടുന്ന വിശിഷ്ട അപ്പത്തെ തലോലിച്ചാണ് രാത്രി കഴിച്ചു കൂട്ടുക.

ഇരുപത്തി രണ്ടാം തീയതി മുതൽ ഒരു ചുവന്ന നെറ്റി സംഘടിപ്പിച്ചു തലവണ കൊണ്ട് വയറും വലിച്ചു കെട്ടി ക്രിസ്തുമസ് പപ്പയുടെ മുഖം മൂടിയും വെച്ചു പാട്ട കൊട്ടി വലിയ ശബ്ദത്തിൽ പാട്ടും പാടി ഞങ്ങൾ കരോളിനിറങ്ങും.അക്കൊല്ലം ചിലവായ തുക ഞങ്ങൾ അങ്ങനെയാണ് തിരിച്ചു പിടിക്കുക. പിരിഞ്ഞു കിട്ടുന്ന കാശിനു ഗോപാലൻ ചേട്ടന്റെ കടയിൽ നിന്നും വയറു നിറയെ പൊറോട്ടയും ബീഫും കഴിക്കും. വർഷത്തിൽ ഒരിക്കൽ മാത്രം, ഞങ്ങൾ പെണ്‍കുട്ടികൾക്ക് രാത്രി പുറത്തിറങ്ങി നടക്കാൻ കിട്ടുന്ന അവസരം ഞങ്ങളെ ശരിക്കും ത്രില്ലടിപ്പിച്ചിരുന്നു. എല്ലാ വല്യേട്ടൻമാരും ഒപ്പം ഉള്ളത് കൊണ്ട് അന്ന് ആരും തടഞ്ഞിരുന്നില്ല രാത്രിസഞ്ചാരം. എങ്കിലും രാവേറെയാകും മുൻപ് ഞങ്ങളെ വീടെത്തിച്ച് അവർ പിന്നെയും ഇരുട്ടിലിറങ്ങി പോകുന്നത് ഞങ്ങൾ പെണ്‍കുട്ടികൾ കൊതിയോടെ നോക്കിനില്‍ക്കുമായിരുന്നു.

പാതിരാകുർബാനയ്ക്ക് പോകാൻ തണുപ്പത്തു കുളിച്ചു,വിറച്ചുവിറച്ച് ഞങ്ങൾ പോകാനിറങ്ങും. പള്ളിയിൽ ഏതെങ്കിലും മൂലയിൽ ഇരുന്ന് ഉറങ്ങിപ്പോകും. ഏതാണ്ട് എഴുമണിയോടു കൂടി കുർബാന കഴിഞ്ഞ് എങ്ങനെയെങ്കിലും വീട്ടിൽ എത്തിയാൽ മതിയെന്നെ ഉള്ളൂ മനസ്സിൽ.

തേങ്ങാപ്പാലിൽ തിളയ്ക്കുന്ന താറാവിറച്ചിയുടെ മണമാണ് ക്രിസ്തുമസ് പുലരിക്ക്, ,മുളകും മല്ലിയും മസാലയും ഇട്ട് തേങ്ങാക്കൊത്തിട്ടു വരട്ടി വറ്റിച്ച പോത്തിറച്ചി അപ്പയ്ക്ക് നിർബന്ധമാണ്. വെള്ളയപ്പം കുറുകിയ ചാറിൽ മുക്കി വായിലിട്ടലിയിച്ചു തിന്നുമ്പോൾ.....ആഹാ...വായിൽ മഞ്ഞനിക്കരപെരുന്നാളിന്റെ ശിങ്കാരിമേളം.അപ്പോൾ മാത്രം തുറക്കുന്ന വൈനിന്റെ വാ വട്ടം കുറഞ്ഞ കുപ്പിക്കഴുത്തിലാണ് അപ്പോൾ ഞങ്ങളുടെ ഹൃദയം. കേക്കും വൈനും കൂടി വിളമ്പിയാലെ ക്രിസ്തുമസ് ആവൂ.

പൂക്കേക്കും കൊണ്ട് വരുന്ന അന്നമ്മാമ്മയും കൈ നിറയെ ചോക്ലേറ്റുമായി വരുന്ന മോളാമ്മയും പുത്തനടുപ്പും കൊണ്ട് പടികയറി വരുന്ന സൂസാച്ചിയും കൂടിയായിരുന്നു എനിക്ക് ക്രിസ്തുമസ്

ഉച്ചതിരിഞ്ഞു ഇത്താപ്പനും ഗൗരിയമ്മയും ഉണ്ണാനുണ്ടാവും. അവർക്കും കൊടുക്കും അമ്മച്ചി ഒരു പുത്തൻ. കുന്നുംപുറം കയറി മറിഞ്ഞു കേക്കും അപ്പവും പങ്കുവെയ്ക്കാൻ ഞങ്ങൾ അയല്‍പക്കത്തേക്കും ഓടും.

നിറങ്ങൾ മാത്രമുണ്ടായിരുന്ന അമ്മച്ചി മണമുള്ള ക്രിസ്തുമസ്ക്കാലം എനിക്കുണ്ടായിരുന്നു. ടി. വിക്ക് മുൻപിൽ ചടഞ്ഞിരിക്കാതെ കടയിൽ നിന്ന് ക്രിസ്തുമസ് വാങ്ങാത്ത ഒരുഗ്രൻ ഓർമ്മക്കാലം. ചോക്ലേറ്റ് അലുക്കുകളിട്ട ഓർമ്മകളിൽ അമ്മച്ചി നിന്നു ചിരിക്കുന്നു. അങ്ങു ദൂരെ സ്വർഗത്തിൽ മാലാഖമാർക്ക് ക്രിസ്തുമസ്കേക്കുണ്ടാക്കി കൊടുക്കുകയായിരിക്കണം അമ്മച്ചിയിപ്പോൾ...

ദിവ്യ ജോൺ ജോസ്

ക്രിസ്മസ്സിനെക്കുറിച്ച് ഓർക്കുമ്പോൾ തന്നെ സന്തോഷത്തിന്റെയും ആഘോഷങ്ങളുടെയും ഭക്ഷണ സമൃദ്ധിയുടെയും പാതിരാകുർബാനയുടെയും കുടുംബാംഗങ്ങളുടെ കൂടിച്ചേരലുകളുടെയുമൊക്കെ ഒരു സീസൺ എന്നു തന്നെയാണ് ആദ്യം മനസ്സിലേക്കു വരുന്നത്. എല്ലാ കൊല്ലവും ആവർത്തിച്ചു വരുന്ന ഒരേ ചടങ്ങുകൾ.

അതിലെന്തെങ്കിലും മാറ്റമുണ്ടായത് ഈ രാജ്യത്തു വന്നതിന് ശേഷമാണ്. ഒരു നവംമ്പർ മാസത്തിലാണ് ഞാൻ നാടുവിട്ട് ഈ രാജ്യത്ത് എത്തിച്ചേരുന്നത്.
ജർമ്മനിയിലെ മ്യൂണിച്ചിൽ കണക്ഷൻ ഫ്ലൈറ്റിനു വേണ്ടി കാത്തിരുന്നപ്പോൾ മുതൽ തണുപ്പ് കാലത്തിന്റെ ഓർമ്മപ്പെടുത്തലുമായി പകലെപ്പോഴോ പെയ്ത മഞ്ഞിന്റെ കൂമ്പാരങ്ങൾ അവിടവിടെ കാണാമായിരുന്നു. മഞ്ഞ് എന്ന് പറഞ്ഞാൽ ക്രിസ്മസ് എന്നാണ് അന്നൊക്കെ ആദ്യം മനസ്സിൽ വരുന്നത്.

നവംബറിലേ തന്നെ പ്രൗഡിയോടെ അണിഞ്ഞൊരുങ്ങിയ അയർലണ്ട് ഒരു അത്ഭുതമായിരുന്നു അന്ന്! ഷോപ്പിങ് മാളുകളും പ്രധാന വഴിയോരങ്ങളും മാത്രമല്ല, ഓരോ വീടും അതി മനോഹരമായിത്തന്നെ ദീപാലാങ്കാരങ്ങളും നക്ഷത്രങ്ങളും സാന്താക്ലോസ്സുമാരും റെയിൻ ഡീർ ഉം എൽഫും ലെപ്രക്കോൺസും കൊണ്ടു നിറഞ്ഞു നിൽക്കും.

ടെലിവിഷനിലാണെങ്കിൽ ക്രിസ്മസ് വിഷയമായുള്ള സിനിമകളും പരസ്യങ്ങളും നിറഞ്ഞോടും.

കുട്ടികൾ വീടിന്റെ ചിമ്മിനിയ്ക്കരികിലായി വച്ചിട്ടുള്ള സാന്തായുടെ സോക്സിൽ നിവേദങ്ങൾ സമർപ്പിക്കുന്ന തിരക്കിലാവും.

ക്രിസ്മസ് ബണ്ണികൾ ചോക്ലേറ്റ് രൂപത്തിൽ ഷോപ്പുകളിൽ നിരന്നിരിക്കും.

നവംബറിലേ തുടങ്ങുന്ന ക്രിസ്മസ് ഷോപ്പിങ്ങുകൾ, പ്രിയപ്പെട്ടവർക്കായി വാങ്ങിക്കൂട്ടുന്ന ഗിഫ്റ്റുകൾ അങ്ങനെ എല്ലാരും ഉത്സാഹത്തിമിർപ്പിലായിരിക്കും എന്നത് അന്നൊരു ആശ്ചര്യമായിരുന്നു.

ഞാനന്ന് ജോലി ചെയ്തിരുന്നിടത്ത് സ്ഥിരം എനിക്കു കിട്ടുന്ന ചില രോഗികൾ ഉണ്ടായിരുന്നു. ഏറ്റവും സന്തോഷത്തിൽ അവിടത്തെ അന്തേവാസികളെ കണ്ടിട്ടുള്ളത് ക്രിസ്മസ് സമയത്താണ്‌.

മക്കളും മരുമക്കളും കൊച്ചുമക്കളും എല്ലാം സമ്മാനങ്ങളുമായി അവരെ കാണാൻ വരുന്നതും സമയം ചെലവഴിക്കുന്നതും പുറത്തു ഡിന്നറിനായി കൊണ്ടുപോകുന്നതും ഏറ്റവും കൂടുതൽ ക്രിസ്മസ് സമയത്ത് നടക്കുമെന്നതിനാലാണ് അവർക്ക് ഈ സമയം ഏറ്റവും പ്രിയപ്പെട്ടതാകുന്നത്.

ഏറ്റവും ആഡംബര പൂർണ്ണമായ ഒരു സ്ഥലമാണതെങ്കിലും, മുഖം ഏറ്റവും തെളിയുന്നത് പ്രിയപ്പെട്ടവരുടെ കൂടെയായിരിക്കുമെന്നുള്ളത് കണ്ടനുഭവിച്ചിട്ടുള്ളതാണ്.

അവിടെയും ചിലർ ഒറ്റപ്പെടും. പറയത്തക്ക ബന്ധുക്കളോ സുഹൃത്തുക്കളോ ഇല്ലാത്തവർ.

അതിലിപ്പോഴും ഓർത്തുവയ്ക്കുന്ന ഒരു മുഖമാണ് "അമേലിയ" എന്ന എൺപത്തിയഞ്ചു വയസ്സുകാരിയുടേത്.

ഇംഗ്ലീഷുകാരിയായ അവർ ഒരു ഐറിഷുകാരനെ വിവാഹം കഴിച്ച് അയർലണ്ടിലേക്കു വന്നതായിരുന്നു 1950 കളിലോ മറ്റോ. കുഞ്ഞുങ്ങളില്ലാത്ത അവർ വിധവയുമായിരുന്നു.

ആദ്യ ദിവസങ്ങളിൽ അവരുടെ മുറിയിലേക്കു ചെല്ലുമ്പോൾ ഒന്നു ചിരിക്കുക കൂടി ചെയ്യുമായിരുന്നില്ല. പൊതുവെ അവർ ഒരു കർക്കശക്കാരിയാണെന്നതും എത്ര നന്നായി ചെയ്തു കൊടുത്താലും ഒരു കുറ്റം കണ്ടുപിടിക്കും എന്നുള്ള അവരുടെ സ്വഭാവം പൊതുവെ ഒരു സംസാരവിഷയമായിരുന്നു.

പുതുതായി ചെന്ന എനിക്ക് അവരുടെ പേരുതന്നെ കിട്ടുകയും ചെയ്തു.

ചെറിയ ചില സഹായങ്ങളേ അവർക്ക് ആവശ്യമുള്ളൂ.
ആദ്യ ദിവസം അവർ ബ്രേക്ക് ഫാസ്റ്റ് കഴിക്കുന്നതിനിടെ കയറിച്ചെന്ന ഞാൻ ചോദിക്കുന്നു.
"ഡു യു മൈൻഡ് ഇഫ് ഐ മേക്ക് എ കപ് ഓഫ് ടീ ഫോർ യു.?"
(നിനക്കു വേണ്ടി ഞാനൊരു കപ്പ് ചായ ഉണ്ടാകട്ടെ എന്ന ആ ചോദ്യത്തിന് കൂർപ്പിച്ചൊരു നോട്ടമല്ലാതെ വേണമെന്നോ വേണ്ടായെന്നോ മറുപടി വന്നില്ല.)

കൈകൾക്ക് ചെറിയ ഒരു വിറയൽ ഉള്ളതുകൊണ്ട് അവർക്ക് ഒരു സഹായം കൂടിയേ തീരൂ.

അവരുടെ അനുവാദത്തിന് കാത്തു നിൽക്കാതെ റ്റീ പോട്ടിൽ നിന്ന് ചായയും അതിലേക്കു പാലും ചേർത്ത് ഒരൂഹത്തിൽ ഒരു ടീസ്പ്പൂൺ പഞ്ചസാരയും ചേർത്തുവച്ചു.

ചെറിയ കൈ വിറയലോടെ അവരതെടുത്ത് കുടിച്ചു.
വീണ്ടും കുടിച്ചു നോക്കി.
എന്നെ അത്ഭുതപ്പെടുത്തിക്കൊണ്ട്,
"ദിസ്  ഈസ് ദ ബെസ്റ്റ് കപ് ഓഫ് ടീ,ഐ എവർ ഹാഡ് " എന്ന് എന്നെ നോക്കി ചിരിച്ചുകൊണ്ടു പറഞ്ഞു.

എന്റെ പെറ്റമ്മ പോലും സമ്മതിക്കാത്ത ഒരു കാര്യം എവിടെയോ ഉള്ള ഒരു മദാമ്മയെക്കൊണ്ട് പറയിച്ച കാലത്തിന്റെ തമാശയോർത്ത് ഞാനൊരു നിമിഷം പുളകം കൊണ്ടു. എനിക്കവരെ കെട്ടിപ്പിടിച്ച് ഉമ്മ വച്ചാലോ എന്നുവരെ തോന്നിപ്പോയി.

ഇന്ത്യൻ ചായ ഉണ്ടാക്കുന്ന വിധമൊക്കെ പറഞ്ഞു കേൾപ്പിച്ചിട്ടാണ് ഞാനന്നു മുറിക്ക് പുറത്തു പോന്നത്.

പിന്നെപ്പിന്നെ കക്ഷിക്ക് ഓരോ വിശേഷങ്ങൾ കേൾക്കുന്നതിൽ താൽപര്യമായി.
എന്തെങ്കിലും പുതിയ വിശേഷങ്ങൾ അവരുടെ അടുത്തുപറയുക എന്നത് എന്റെയും ഒരു സന്തോഷമായി.

മിക്കവാറും അടുത്തിടെ കണ്ട സിനിമകളോ, നാട്ടിലെ വിശേഷങ്ങളോ, ആഘോഷങ്ങളോ അങ്ങനെയൊക്കെയാകും സംസാരങ്ങൾ.

എന്തായാലും പിന്നീടങ്ങോട്ട് എന്നോട് മുഖം കനപ്പിച്ച് ഒന്നും പറയാനിട വന്നിട്ടില്ല.

ചിലപ്പോഴെല്ലാം പാചകത്തെക്കുറിച്ച് സംസാരിക്കും. അമേലിയ  ഒരു നല്ല കുക്ക് ആയിരുന്നു.

ഷെപ്പേർഡ്സ് പൈയും ആപ്പിൾ ടാർട്ടും ഒക്കെ ഉണ്ടാക്കുന്നതിനെക്കുറിച്ച് പറയുമ്പോൾ ചിക്കൻ കറിയെപ്പറ്റിയും പോർക്കും കൂർക്കയെയും ഒക്കെ പൊക്കിപ്പറഞ്ഞ് ഞാൻ ബാലൻസ് ചെയ്തു നിൽക്കും.

എന്റെ പാചക നൈപുണ്യം കട്ടൻ ചായ / കട്ടൻ  കാപ്പി ആ ലെവലിൽ നിൽക്കുന്ന സമയമാണ് അന്ന്.

നാട്ടിൽ വച്ച് ബുദ്ധി കൂർമ്മതയും കർമ്മ കുശലതയുമൊന്നും അത്രയും വേണ്ടാത്ത മുറ്റമടി, മുറി തൂക്കൽ എന്നീ പ്രാചീനാചാരങ്ങൾ ചെയ്യുമെന്നൊഴിച്ച്,
അടുക്കളയിൽ കയറി വായയ്ക്ക് രുചിയുള്ളതൊന്നും ഉണ്ടാക്കിയതായി എന്റെ നേരിയ ഒരോർമ്മയിൽ പോലും ഇല്ലായിരുന്നു.

പക്ഷേ, ബീഫ് വരട്ടിയതിൽ ഇച്ചിരി അരപ്പു കൂടിയാലോ കുറഞ്ഞാലോ, അല്ലെങ്കിൽ പോർക്കും ചക്കയും വയ്ക്കുമ്പോൾ ചക്കയുടെ അളവ് ആനുപാതികമായി അല്‍പമൊന്നു കൂടിയാലോ മീനും മാങ്ങയും കറി വയ്ക്കുമ്പോൾ തലപ്പാല് ഇച്ചിരെ കുറഞ്ഞാലോ ഞൊടിയിട കൊണ്ടു മനസ്സിലാക്കാനുള്ള അത്ഭുത സിദ്ധി എന്റെ നാസാരന്ധ്രങ്ങൾക്കും രുചി മുകുളങ്ങൾക്കും വളരെ ചെറുപ്പത്തിലേ സിദ്ധിച്ചിരുന്നു എന്ന് എടുത്ത് പറയേണ്ടിയിരിക്കുന്നു.

അതുകൊണ്ട് തേങ്ങാപ്പാലൊഴിച്ച് ഉരുളക്കിഴങ്ങ് ഒക്കെ ഇട്ടുവയ്ക്കുന്ന നാടൻ ചിക്കൻ കറിയെയൊക്ക പറഞ്ഞ് അമേലിയയെ കൊതിപ്പിക്കുക എന്നത്  എന്റെ ക്രൂരവിനോദങ്ങളിലൊന്നായിരുന്നു.

അങ്ങനെ ആ വർഷത്തെ, (ഇവിടത്തെ എന്റെ ആദ്യത്തെ )ക്രിസ്തുമസ് വന്നു.

മേൽപ്പറഞ്ഞ എല്ലാ മേളാങ്കങ്ങളോടും കൂടി എല്ലാവരും ക്രിസ്മസ് ആഘോഷങ്ങളിലേക്ക് കടന്നു.

ക്രിസ്മസിന്റെ തലേന്ന് ഉണ്ടായ വലിയ പാർട്ടിയിൽ എല്ലാവരും ആഹ്ലാദത്തോടെ പങ്കുചേർന്നു.

പിരിയുന്നതിന് മുമ്പ് അമേലിയ എനിക്കൊരു ഗിഫ്റ്റും തന്നു.
ചെറിയൊരു ക്രിസ്റ്റൽ ക്രിബ്.
അതിന്റെ ഒരു സന്തോഷത്തിൽ ഞാൻ തിരിച്ച് പറഞ്ഞു.
" ഞാനും നിനക്കായി ഒരു സമ്മാനം തരുന്നുണ്ട്. "
ഒരു നിമിഷം ചിന്തിച്ചിട്ട് അവർ പറഞ്ഞു.

"എനിക്ക് നാളെ നീ ഒരു ചിക്കൻ കറി ഉണ്ടാക്കി തരുമോ?"

ഒരു നിമിഷം എനിക്ക് ചെറിയ ഒരു ക്ഷീണം അനുഭവപ്പെട്ടു.
ചെറിയ തലകറക്കവും.
തൊണ്ടയിൽ ഒരു ചെറിയ പിടുത്തം പോലെ തോന്നുകയും ചെയ്തു എന്നു ഞാൻ സ്മരിക്കുന്നു.

പാവം, എന്റെ വാചക കസർത്ത് കേട്ട് പാചക ശിരോമണിയാണെന്ന് തെറ്റിദ്ധരിച്ച് വശമായിരിക്കുന്നു.

ഇതൊന്നും എനിക്കറിയില്ല എന്നു പറഞ്ഞാൽ, വിശ്വാസ വഞ്ചനക്കുറ്റം ചുമത്തി ഇവരുടെ തനി സ്വഭാവം നാളെ മുതൽ എന്റടുത്ത് കാണിക്കാൻ തുടങ്ങും.

എന്തായാലും ഒരു കൈ നോക്കാൻ തീരുമാനിച്ചു. വീട്ടിൽ വിളിച്ച് റെസിപ്പി എഴുതി മേടിച്ചു.

ക്രിസ്മസ്സിന്റെ അന്നു ഞാൻ ചിക്കൻ കറി ഉണ്ടാക്കാൻ തീരുമാനിച്ചു.

ഉച്ചയ്ക്ക് ട്രഡീഷണൽ ടർക്കി ഡിന്നർ ആയത് കൊണ്ട് എന്റെ പരീക്ഷണം വൈകീട്ട് ആക്കി.

ഞാൻ അന്ന് ആദ്യമായി ചിക്കൻ കറി ഉണ്ടാക്കി എന്നു മാത്രമല്ല, മഞ്ഞു പെയ്യുന്നതും ആദ്യമായി അന്നാണ് കാണുന്നത്.
കുറേയേറെ വർഷങ്ങൾക്കു ശേഷം ആ വർഷമാണ് ഒരു " വൈറ്റ് ക്രിസ്മസ് " ഉണ്ടാകുന്നതെന്ന് ആളുകൾ പറയുന്നുണ്ടായിരുന്നു.

വൈകീട്ട് ചിക്കൻ കറിയുടെ നിർമ്മാണ പ്രവർത്തനങ്ങളിലേയ്ക്ക് ഞാൻ തിരിഞ്ഞു.

എഴുതി വച്ച പോലെയും തിന്നുന്ന പോലെയും അത്ര എളുപ്പമല്ല കാര്യങ്ങൾ എന്ന് ആദ്യ കുറച്ച് മിനിട്ടുകൾക്കുള്ളിൽ വിയർത്തു നിന്ന് കൊണ്ടു  ഞാൻ തിരിച്ചറിഞ്ഞു.

പക്ഷേ, സ്വതവേയുള്ള ഒരു മനോധൈര്യത്തിൽ ഞാൻ വല്ല വിധേനയും കറി അവസാന സ്റ്റേജിൽ എത്തിച്ചു. വേഗത്തിൽ എഴുതി എടുത്തതായത് കൊണ്ട് ഒരു Outline Story പോലെയാണ് പാചകക്കുറിപ്പിന്റെ  എഴുത്ത്.

റെസിപ്പിയുടെ അവസാനം " പാല് ചേർക്കുക " എന്നും കണ്ടു.
അതും ചേർത്ത് ഒരു തിളകൂടി വന്ന ചിക്കൻ കറി താളിച്ച് മാറ്റി വച്ചു.
ചെറുതായി ചൂടാറിയപ്പോൾ ചോറും കറിയുമായി അവരുടെ മുറിയിൽ ചെന്നു.
മാനേജരുടെ കൈയിൽ നിന്നുംനേരത്തെ അനുവാദം കിട്ടിയിരുന്നതു കൊണ്ട് അമേലിയ കാത്തിരിക്കുന്നുണ്ടായിരുന്നു.

അവർ ചോറും കറിയും ആവേശത്തോടെ കഴിക്കുന്നത് ആത്മ നിവൃതിയോടെ ഞാൻ നോക്കി നിന്നു.

എനിക്കു കരച്ചിൽ വന്നു.

പിറ്റേന്ന് നേരം പരാ പരാ വെളുത്തപ്പം നാട്ടിലേക്ക് വിളിച്ച് മാതാവിനോട് കറി വച്ച കാര്യം പറഞ്ഞു.

"നിങ്ങൾക്ക് തേങ്ങാപ്പാല് അവിടെ കിട്ടോ?" എന്നു മാതാവ്
"എന്തൂട്ടിനാ ഇപ്പ തേങ്ങാപ്പാല്....?" ഞാൻ തിരിച്ച് ചോദിക്കുന്നു.

" അപ്പൊ നീ ചിക്കൻ കറീല് തേങ്ങാപ്പാലൊഴിച്ചില്ലേ? അവസാനം അതൊഴിക്കണന്ന് ഞാൻ പറഞ്ഞ്  തന്നാർന്നല്ലോ?"മാതാവ്.

"ഓഹ്... " റെസിപ്പി ഒന്ന് കൂടി നോക്കി.
ദാണ്ടെ ഏറ്റവും താഴെ "പാലു ചേർക്കുക "

ശരിയാണല്ലോ.....
ഞാൻ പാല് ചേർത്തതാണല്ലോ....
പക്ഷേ വെപ്രാളത്തിൽ ചേർത്തത് പശൂന്റെ പാലാന്ന് മാത്രം...!

ഒരു നിമിഷം അത് കഴിച്ച അമേലിയയെക്കുറിച്ചോർത്തപ്പം ഒന്നു ഭയന്നു.

മിക്കവാറും വയറിളക്കമോ ഛർദ്ദിയോ പിടിപെട്ടിട്ടുണ്ടാകുമെന്ന ഒരു സ്വാഭാവിക സാദ്ധ്യതയെ തള്ളിക്കളയാൻ മനസ്സനുവദിച്ചില്ല.

ഡ്യൂട്ടിക്ക് ചെന്നപ്പം,നൈറ്റ് ഷിഫ്ടിലുള്ളവരോട് മയത്തിൽ ചോദിച്ചു.
അവിടെ പ്രശ്നങ്ങളൊന്നും ഉണ്ടായതായി റിപ്പോർട്ടിലില്ല.

ശങ്കിച്ച് അവരുടെ മുറിയിൽ ചെന്നു.

ആൾ മുറിയിലില്ല.
ടോയ്ലറ്റിൽ നിന്നും അസാധാരണ ശബ്ദകോലാഹലങ്ങൾ ....
പരീക്ഷിണയായി അമേലിയ ഇറങ്ങി വന്നു.

"യുവർ ചിക്കൻ കറി വാസ് റ്റൂ സ്പൈസി...
എന്റെ വയറ് പുകയുന്നു"

ഹോ... എരിവ് ആണ് പ്രശ്നക്കാരൻ.
എരിവിന്റെ അസ്വസ്ഥതയേ കക്ഷിക്കുള്ളൂ.

എങ്കിലും ചിരിച്ച് കൊണ്ടവർ പറഞ്ഞു.
"എനിക്കിഷ്ടമായി നിന്റെ "ടൈഫൂൺ " ചിക്കൻ കറി. ഇനിയും എനിക്ക് ഉണ്ടാക്കി തരണം

സമാധാനമായി.
പ്രശ്നങ്ങളൊന്നും പിന്നെ ചിക്കൻ കറി ഉണ്ടാക്കിയില്ല.

കുറച്ച് നാളിന് ശേഷം ഞാൻ പുതിയ ജോലിസ്ഥലത്തേയ്ക്ക് പോന്നു.

പിന്നീടൊരു ദിവസം വിളിച്ചപ്പോൾ അറിഞ്ഞു ഒരു തണുത്ത പ്രഭാതത്തിൽ ശാന്തമായ ഉറക്കത്തിലെന്ന പോലെ അമേലിയ കടന്ന് പോയി എന്ന്.

ഇപ്പോഴും ചില ക്രിസ്മസ് സമയങ്ങളിൽ അമേലിയയും ടൈഫൂൺ ചിക്കൻ കറിയും ക്രിസ്റ്റൽ ക്രിബുമെല്ലാം ഓർമ്മയിൽ വന്ന് പോകും.

ഒരു ചിരിയോടെ....
ഒരു വേദനയോടെ....
ചില ശേഷിപ്പുകൾ!

വീണ ചിറയ്ക്കൽ

'എനിക്കു നീതി വേണം യുവർഓണർ' , നായരകന്റെ നിസ്സഹായമായ ആ ഡയലോഗിനൊപ്പം ഹിറ്റായത് ചിത്രത്തിലെ കുർത്തകൾ കൂടിയായിരുന്നു. പറഞ്ഞു വന്നത് തിയറ്ററുകൾ നിറഞ്ഞോടുന്ന ജയസൂര്യ ചിത്രം പുണ്യാളൻ പ്രൈവറ്റ് ലിമിറ്റഡിന്റെ കാര്യമാണ്. ചിത്രം പുറത്തിറങ്ങുമ്പോൾ അതിലെ കുർത്തകൾ ഇത്രത്തോളം ഹിറ്റാകുമെന്ന് പ്രതീക്ഷിച്ചിരുന്നില്ലെന്ന് ഡിസൈനറും ജയസൂര്യയുടെ ഭാര്യയുമായ സരിത പറയുന്നത്. പിന്നെ എന്റെ ഭർത്താവിനെ സുന്ദരനായി ഒരുക്കാൻ ഉള്ളത്രയും ആത്മവിശ്വാസവും മറ്റൊന്നു ചെയ്യുമ്പോഴും ഇല്ലെന്നും നിറഞ്ഞ ചിരിയോടെ പറയുന്നു സരിത. സരിതാ ജയസൂര്യ ഡിസൈൻ സ്റ്റുഡിയോ എന്ന ബ്രാന്റിന്റെ ജൈത്രയാത്രയെക്കുറിച്ചും ക്രിസ്മസ് സ്പെഷൽ ഡിസൈനുകളെക്കുറിച്ചും ജയസൂര്യയെയും മക്കളെയുംകുറിച്ചുമൊക്കെ മനോരമ ഓൺലൈനുമായി വിശേഷങ്ങൾ പങ്കുവെക്കുകയാണ് സരിത.

സരിതാ ജയസൂര്യ ഡിസൈൻ സ്റ്റുഡിയോ ക്രിസ്മസിനെ വരവേൽക്കുന്നതെങ്ങനെയാണ്?
സരിതാ ജയസൂര്യ ഡിസൈൻ സ്റ്റുഡിയോയിൽ ഇപ്പോഴുള്ളവയെല്ലാം ഞങ്ങളുടേതു മാത്രമായ എക്സ്ക്ലൂസീവ് ഡിസൈനുകളാണ്. എല്ലാ വർഷത്തെയുംപോലെ സാരിയിലാണ് ഇക്കുറിയും ക്രിസ്മസ് സ്പെഷൽ ഡിസൈനുകൾ ചെയ്തു തുടങ്ങിയതെങ്കിലും ആവശ്യക്കാർ കൂടിയതോടെ സമാനമായ ഡിസൈനുകളിൽ കുർത്തികളും സൽവാറുമൊക്കെ ചെയ്യുന്നുണ്ട്. ക്രിസ്മസ് എന്നു പറയുമ്പോൾ തന്നെ വെള്ളയും ചുവപ്പും നിറത്തിലുള്ള വസ്ത്രങ്ങളാണ് കൂടുതൽ കാണാറുള്ളത്, അതിൽ നിന്നും വ്യത്യസ്തമായി കറുപ്പു നിറത്തിലാണ് ഇത്തവണ സാരികളും സൽവാറുകളുമൊക്കെ ഡിസൈൻ ചെയ്തിരിക്കുന്നത്. കറുപ്പു നിറത്തിലുള്ള ലിനൻ സിൽക്കിൽ ബീഡ്സും സീക്വൻസും എംബ്രോയ്ഡറിയുമൊക്കെ ചെയ്ത് ചുവപ്പു നിറത്തിലുള്ള ക്രിസ്മസ് േബാളുകളും നക്ഷത്രങ്ങളുമൊക്കെയുള്ള ഡിസൈനുകളാണിവ. ഒരു വ്യത്യസ്തതയ്ക്കു വേണ്ടിയും പിന്നെ പലരുടെയും ഇഷ്ടനിറം എന്നതുമൊക്കെ കണക്കിലെടുത്താണ് ബ്ലാക്ക് തിരഞ്ഞെടുത്തത്.

വീട്ടിലെ ക്രിസ്മസ് ആഘോഷം എങ്ങനെയാണ്?

പണ്ടുതൊട്ടെ ക്രിസ്മസ് തലേന്ന് പള്ളിയിൽ പോകുന്ന ശീലമുള്ളയാളാണ് ജയൻ. എവിടെയായാലും അതു മാത്രം മുടക്കാറില്ലായിരുന്നു. വിവാഹ ശേഷം ഞാനും പോയിത്തുടങ്ങി, ഇപ്പോൾ മക്കളെയും കൂട്ടിയാണ് പോകാറുള്ളത്. എല്ലാവരെയും പോലെ അന്നത്തെ ദിവസം നല്ല ഭക്ഷണം വിരുന്നുകാർ ഇതൊക്കെ തന്നെയാണ് വീട്ടിലെയും പതിവ്. അമ്മൂമ്മയും അമ്മയും ഒക്കെ ഒപ്പം തന്നെയുള്ളതുകൊണ്ട് എല്ലാവരും ചേർന്നുള്ള പാചകമൊക്കെയായി നല്ല രസമായിരിക്കും.

മറക്കാനാവാത്ത ക്രിസ്മസ് ഓർമ?

ഓരോ ക്രിസ്മസ് കാലവും ഓർത്തെടുക്കുമ്പോൾ ആദ്യം മനസ്സിൽ വരിക യാത്രകളാണ്. വെക്കേഷൻ സമയം ആയതുകൊണ്ടുതന്നെ മറ്റൊരു തിരക്കുകൾക്കും പിടികൊടുക്കാതെ യാത്രകൾക്കു വേണ്ടി പൂർണമായും നീക്കി വെക്കുന്ന ദിവസ്സങ്ങളാണ് അവ. യാത്രകൾ എന്നു പറയുമ്പോൾ തന്നെ അവ മറക്കാനാവാത്ത ഓർമകൾ തന്നെയാണല്ലോ. കഴിഞ്ഞ ക്രിസ്മസ് കാലത്ത് ഞങ്ങൾ ഹോങ്കോങ്ങിലായിരുന്നു. ഇക്കുറിയും പദ്ധതികളുണ്ട്.

പുതിയ സിനിമകൾ ഏതെങ്കിലും?

സത്യത്തിൽ ഞാൻ ഞങ്ങളുടെ പ്രൊഡക്ഷൻ കമ്പനിയുടെ ചിത്രങ്ങൾ മാത്രമേ ചെയ്യാറുള്ളു. അതിെലാരു മാറ്റം വന്നത് ഫുക്രിയിലും ഇപ്പോൾ ചെയ്ത ആട് ഒരു ഭീകരജിവിയുടെ സെക്കൻഡ് പാർട്ടിലുമാണ്. എന്നെ സംബന്ധിച്ചിടത്തോളം ഏതു സിനിമയ്ക്കു വേണ്ടി ഡിസൈൻ ചെയ്താലും പൂർണമായും അതിൽ ഫോക്കസ്ഡ് ആവണം എന്നു വിചാരിക്കുന്ന ആളാണ്. പ്രേതം ചെയ്തപ്പോഴും അതിലെ രണ്ടു നടിമാർക്കു വേണ്ടി ഡിസൈൻ ചെയ്യുമ്പോഴും മുഴുവൻ സമയം കൂടെയുണ്ടായിരുന്നു. ഏതെങ്കിലും ഒരു സീനിന് ഒരു വസ്ത്രം ചേരുന്നില്ലെന്നു തോന്നിയാൽ അതു തിരുത്തി ചേരുന്ന മറ്റൊന്നു നൽകാൻ നാം അവിടെ ഉണ്ടാകണം. പിന്നെ ജയനു വേണ്ടി ചെയ്യുമ്പോൾ അതെന്റെ ഭർത്താവല്ലേ എത്ര സുന്ദരനാക്കണമെന്ന കാര്യത്തിൽ എനിക്കു വളരെയധികം ആത്മവിശ്വാസമുണ്ടാകും. വല്ലപ്പോഴുമേ ചെയ്യുന്നുള്ളുവെങ്കിലും അതു നന്നായിരിക്കണം എന്നു ചിന്തിക്കുന്നയാളാണ് ഞാൻ. ജയനും പറയാറുള്ളത് അതു തന്നെയാണ്. വർഷത്തിൽ എത്ര പടം ചെയ്യുന്നുവെന്നതിനേക്കാൾ എത്ര നല്ല ചിത്രങ്ങൾ ചെയ്യുന്നു എന്നതിലാണു കാര്യം.

ആട് 2വിലേക്കെത്തുമ്പോള്‍ ഷാജി പാപ്പന്റെ ലുക്കിനു മാറ്റമുണ്ടോ?

ആട് ഭീകരജീവിയുടെ ആദ്യഭാഗത്തിൽ ഷാജി പാപ്പന് കറുപ്പും ചുവപ്പും നിറത്തിലുള്ള വസ്ത്രങ്ങളായിരുന്നു സിനിമയിലുടനീളം. എന്നാൽ ആട് 2വിലേക്കെത്തുമ്പോള്‍ അതിനൊരു മാറ്റമുണ്ട്. കറുപ്പും ചുവപ്പിനും പുറമെ വേറെ ചില നിറങ്ങളും ഇതിലുണ്ട്. കൂടാതെ ഷാജി പാപ്പന്റെ ഡിഫ്രന്റ് സ്റ്റൈലിലുള്ള മുണ്ടും കാണാം. ബാക്കിയെല്ലാം സസ്പെൻസ് ആയിരിക്കട്ടെ. പാപ്പന് ധാരാളം ആരാധകർ ഉള്ളതുകൊണ്ടു തന്നെ ഈ വസ്ത്രങ്ങളും ഹിറ്റാകുമെന്നു പ്രതീക്ഷയുണ്ട്. പൊതുജനങ്ങളുടെ ആവശ്യപ്രകാരം രണ്ടാം ഭാഗം ഇറക്കിയ പടമല്ലേ, മുൻചിത്രത്തെപ്പോലെ തന്നെ ആട് 2വും അതിലെ സ്റ്റൈലും അവർ സ്വീകരിക്കപ്പെടും എന്നു കരുതുന്നു.

സിനിമകൾക്കു കോസ്റ്റ്യൂം ചെയ്യുന്നതാണോ അതോ സാധാരണക്കാർക്കു വേണ്ടി ചെയ്യുന്നതാണോ സന്തുഷ്ടയാക്കുന്നത്?

രണ്ടും രണ്ടുരീതിയില്‍ എന്നെ സന്തുഷ്ടയാക്കാറുണ്ട്. സിനിമകളില്‍ കഥാപാത്രങ്ങൾക്കും സീനുകൾക്കും ചേരുന്ന ഡിസൈനുകളാണു വേണ്ടത്. ആ പരിമിതിക്കുള്ളിൽ നിന്നുകൊണ്ട് എത്രത്തോളം മനോഹരമാക്കാം എന്നാണു ചിന്തിക്കേണ്ടത്. അടുത്തതിൽ എനിക്കു കൂടുതൽ ക്രിയേറ്റിവിറ്റിയും സ്പേസും കിട്ടുന്നുണ്ട്. അതും ഞാൻ ആസ്വദിക്കുന്നുണ്ട്. ഇപ്പോൾ പുണ്യാളൻ ഇറങ്ങിയപ്പോൾ അതില്‍ ജയൻ ഇട്ട കുർത്തയ്ക്കു വേണ്ടി എത്ര ആവശ്യക്കാരായിരുന്നുവെന്നോ വിളിച്ചത്. ലൂസ് ആയിട്ടുള്ള ലളിതമായ ആ കുർത്ത ഇത്രത്തോളം ഹിറ്റാകുമെന്ന് വിചാരിച്ചിരുന്നേയില്ല. അതിന്റെ കളർ, ഫാബ്രിക്, കോമ്പിനേഷൻ ഒക്കെ ഇഷ്ടമായെന്നു പറഞ്ഞ് ഒത്തിരിപേർ ഓർഡർ ചെയ്തു. സിനിമ എന്ന മാധ്യമത്തിലൂടെയാകുമ്പോൾ ഒത്തിരി പേരിലേക്ക് എത്തപ്പെടും എന്ന നേട്ടമുണ്ട്.

ജയസൂര്യയുടെ പിന്തുണ?

ജയന്റെ പിന്തുണയെക്കുറിച്ച് എങ്ങനെ പറഞ്ഞാലാണ് തീരുക എന്നറിയില്ല. അത്രത്തോളമുണ്ട്. എന്തൊരു പുതിയ ആശയം പറഞ്ഞാലും കട്ട സപ്പോർട്ടുമായി കൂടെയുണ്ടാകും കക്ഷി. രണ്ടാമതൊന്നാലോചിക്കാതെ തുടക്കം മുതൽ ഒടുക്കം വരെ കൂടെനിൽക്കുന്ന ജയൻ ഉള്ളതു തന്നെയാണ് എന്റെ കരുത്ത്. പരസ്പര ബഹുമാനവും പ്രചോദനവും പരസ്പരം നൽകുന്ന സ്വാതന്ത്രവും സ്പെയ്സും ഒക്കെ തന്നെയാണ് ജയൻ എന്ന ഭർത്താവിനെ വേറിട്ടു നിർത്തുന്നത്.

തിരക്കുള്ള നടന്റെ ഭാര്യ, ഫാഷൻ ഡിസൈനർ, ഒപ്പം മക്കളുടെ കാര്യങ്ങളും. എല്ലാം ബാലൻസ് ചെയ്യുന്നതെങ്ങിനെ?

ജയന്റെ സിനിമകളെല്ലാം മുപ്പതു മുതൽ നാൽപത്തിയഞ്ചു ദിവസം വരെയൊക്കെയേ കാണൂ. അതു കഴിഞ്ഞാൽ ഒരു ബ്രേക് എടുക്കുന്നത് നിർബന്ധമാണ്. ആ സമയത്ത് ഞങ്ങൾ യാത്ര ചെയ്യുകയും മക്കളുടെ സ്കൂളിലും മറ്റും പോയി അവര്‍ക്കു വേണ്ടി മുഴുവനായി സമയം കണ്ടെത്തുകയും ചെയ്യും. ജയൻ കൂടെയുള്ളപ്പോള്‍ മറ്റെല്ലാവരെയുംപോലെ പുറത്ത് ഔട്ടിങ്ങിനുപോയി വൈകീട്ട് ഡ്രൈവ് ചെയ്തുവരുന്ന സാധാരണ ജീവിതമാണ് ഞങ്ങളുടേത്. ഇനിയിപ്പോ ലൊക്കേഷനിലാണെങ്കിലും ഒരു മൂന്നുനാലു ദിവസം കൂടുമ്പോൾ ജയൻ ഞങ്ങൾക്കരികിലേക്കെത്തും. വീക്കെൻഡ്സ് ഒക്കെയാകുമ്പോൾ ഞങ്ങൾ അങ്ങോട്ടും പോകും. എല്ലാം ബാലൻസ് ചെയ്തു കൊണ്ടുപോകാൻ കഴിയുന്നതുകൊണ്ട് ടെൻഷനൊന്നും ഇല്ല.

മക്കള്‍ക്ക് ഫാഷനോ സിനിമയോ കൂടുതൽ പ്രിയം?

മകൾ വേദയ്ക്ക് ആറു വയസ്സേ ആയിട്ടുള്ളു. അവൾ ഇപ്പോഴേ ഫാഷന്റെ പുറകെയാണ്. പെൺകുട്ടിയായതുെകാണ്ട് ഒരുങ്ങുന്നതിന്റെ കാര്യം പ്രത്യേകം പറയേണ്ടല്ലോ. കക്ഷി നന്നായി വരയ്ക്കുകയും ചെയ്യും. അദ്വൈതിനു പന്ത്രണ്ടു വയസ്സായി. അവന് അച്ഛനെപ്പോലെ തന്നെ സിനിമയാണ് ഇഷ്ടമുള്ള മേഖല. ആൾ ഇപ്പോഴേ സിനിമാ അഭിനയത്തിലും ഷോർട്ട് ഫിലിം സംവിധാനത്തിലും എഡിറ്റിങ്ങിലുമൊക്കെ കൈവച്ചിട്ടുണ്ട്. അവനാണെങ്കിൽ ഫാഷനെക്കുറിച്ച് തീരെ ബോധവാനല്ല. ഞാൻ എന്തു െകാടുക്കുന്നോ ഒരു പരാതിയിലുമില്ലാതെ അതിട്ടോളും.

ഫാഷൻ മന്ത്ര അങ്ങനെയെന്തെങ്കിലും?

മിനിമലിസ്റ്റിക് ഒപ്പം എലഗന്റ് ലുക്ക് ഇതാണ് ഫാഷനിൽ ഞാൻ ഫോളോ ചെയ്യുന്ന കാര്യം. എന്റെ ഡിസൈനുകളിലും ആ ഒരു ടച്ച് കാണാന്‍ കഴിയും. ഒന്നും ഹെവി ആവാതെ മിനിമൽ ലുക്ക് ആയിരിക്കുന്നതിലാണ് കൂടുതൽ സൗന്ദര്യം. അതിനേക്കാളെല്ലാമുപരി നമുക്കു ചേരുന്നതു ധരിക്കുക എന്നതിലാണു പ്രാധാന്യം.