ആദ്യമായി ഐസ്ക്രീം കഴിക്കുന്ന കുഞ്ഞാവയുടെ ക്യൂട്ട് വിഡിയോ

ശെടാ ഇത്രേം സൂപ്പർ ഐസ്ക്രീം ഉണ്ടായിരുന്നിട്ടാണോ അമ്മ ഇത്രയും നാൾ ഈ ബേബി ഫുഡൊക്കെ എന്നെക്കൊണ്ട് കഴിപ്പിച്ചത്... ആദ്യമായി ഐസ്ക്രീം കഴിക്കുന്ന ഒരു കുഞ്ഞാവയുടെ സൂപ്പർ ക്യൂട്ട് വിഡിയോ വൈറലാകുകയാണ്. ഒരു സ്കൂപ്പ് ഐസ്ക്രീം ഈ കുഞ്ഞാവയ്ക്കു നേരെ നീട്ടുന്നത് കാണാം. ആദ്യം പതിയെ അതിലൊന്നു നക്കി നോക്കി കക്ഷി, ഇനി എങ്ങാനും പറ്റിക്കാനാണെങ്കിലോ?. പക്ഷേ സംഭവം വേറെയാണെന്നു പിടികിട്ടിയ കുഞ്ഞാവയുടെ ആ മുഖഭാവം ഒന്നു കാണേണ്ടതു തന്നെയാണ്.

രുചിപിടിച്ച വാവ ഒറ്റച്ചാട്ടത്തിന് കുഞ്ഞികൈ കൊണ്ട് ആ കോൺ ഐസ്ക്രീമിൽ പിടുത്തമിട്ടു. പിന്നെ ഞാനിതാർക്കും കൊടുക്കില്ല എന്ന ഭാവത്തിൽ ചറപറാന്ന് അകത്താക്കാൻ തുടങ്ങി കക്ഷി. ഒൻപത് മാസം മാത്രം പ്രായമുള്ള ബ്ലെയ്ക്ക​ലി എന്ന വാവയാണ് ഈ വിഡിയോയിലെ താരം. മകളുടെ ഈ കുറുമ്പ് കണ്ട് ചിരിയടക്കാനാവാതെ മാതാപിതാക്കളും.

ബ്ലെയ്ക്ക്​ലിയുടെ ഈ ഐസ്ക്രീം വിഡിയോ അമ്മ ബ്രിട്ടാണി ടിക്ടോക്കിലാണ് ആദ്യം പങ്കുവച്ചത്. എന്നാൽ വളരെപ്പെട്ടെന്നു തന്നെ മറ്റ് സമൂഹമാധ്യമങ്ങളിലും ഈ ക്യൂട്ട് വിഡിയോ വൈറലായി.

Summary : Baby's cute reaction to her first ice cream viral video