മുംബൈ ഭീകരാക്രമണത്തിനു പിന്നിൽ പാക്കിസ്ഥാൻ ആണെന്നു തെളിഞ്ഞതോടെ അവരുമായുള്ള ഔദ്യോഗിക ചർ‍ച്ചകൾ ഇന്ത്യ അവസാനിപ്പിച്ചു. ഇന്ത്യ–പാക് ഭരണാധികാരികൾ പലപ്പോഴായി ഉച്ചകോടികളിലും മറ്റും കൂടിക്കണ്ടതല്ലാതെ മറ്റ് ഔദ്യോഗിക ചർച്ചകളൊന്നും ഇതുവരെ നടന്നിട്ടില്ല. ഇന്ത്യ–പാക്ക് ക്രിക്കറ്റ് പരമ്പരകൾക്കും ആക്രമണത്തോടെ അവസാനമായി. പാക്കിസ്ഥാനുമായി ക്രിക്കറ്റ് ബന്ധം പുനരാരംഭിക്കില്ലെന്നു ബിസിസിഐയും വ്യക്തമാക്കിയിട്ടുണ്ട്. ലഷ്കറെയുടെ അടുപ്പക്കാരനും ജമാഅത്തുദ്ദഅവ തലവനുമായ ഹാഫിസ് സയീദാണ് മുംബൈ ആക്രമണം ആസൂത്രണം ചെയ്തതെന്നു ഒട്ടേറെ രേഖകൾ സഹിതം തെളിവുകൾ ഇന്ത്യ പാക്കിസ്ഥാനെ അറിയിച്ചിരുന്നു. ഭീകരതയ്ക്കെതിരെ നടപടിയെടുക്കാൻ രാജ്യാന്തര തലത്തിലും പാക്കിസ്ഥാനു മേല്‍ സമ്മർദം ശക്തമായി. തുടർന്ന് മുഖ്യ സൂത്രധാരൻ സാക്കിയുർ റഹ്മാൻ ലഖ്‌വി ഉൾപ്പെടെ ഏഴു പേർക്കെതിരെ കേസെടുത്തിരുന്നു. പക്ഷേ ലഖ്‌വിയെ അനധികൃതമായി തടങ്കലിൽ വച്ചിരിക്കുകയാണെന്നു കാണിച്ച് പാക്കിസ്ഥാൻ ഹൈക്കോടതി 2015 മാർച്ച് 13ന് വെറുതെ വിടാൻ ഉത്തരവിട്ടു. ഏപ്രിലിൽ ജാമ്യം നേടി ലഖ്‌വി പുറത്തിറങ്ങി.
2017 ജനുവരിയിൽ ഹാഫിസ് സയീദിനെയും പാക്കിസ്ഥാൻ വീട്ടു തടങ്കലിലാക്കിയെങ്കിലും 2017 നവംബറിൽ മോചിപ്പിച്ചു. സയീദിനെതിരെ മതിയായ തെളിവുകളില്ലെന്ന മുടന്തൻ ന്യായമുന്നയിച്ചായിരുന്നു പാക്ക് കോടതി മോചിപ്പിച്ചത്. ഹാഫിസ് സയീദിന്റെ നേതൃത്വത്തിലുള്ള രാഷ്ട്രീയ പാർട്ടിയായ ഇസ്‌ലാമിസ്റ്റ് മില്ലി മുസ്‌ലിം ലീഗിനെ (എംഎംഎൽ) അമേരിക്ക ഭീകരസംഘടനകളുടെ പട്ടികയിൽ പെടുത്തിയിരിക്കുകയാണ്. സയീദിനെ യുഎസ് ആഗോള ഭീകരനായും പ്രഖ്യാപിച്ചിരുന്നു. യുഎന്നിന്റെ കരിമ്പട്ടികയിലും എംഎംഎല്ലുണ്ട്. 2018ൽ പാക്കിസ്ഥാൻ പൊതുതിരഞ്ഞെടുപ്പിൽ മത്സരിക്കാൻ ശ്രമിച്ചെങ്കിലും മേൽപ്പറഞ്ഞ കാരണങ്ങളാൽ എംഎംഎല്ലിന് അംഗീകാരം ലഭിച്ചില്ല. അതിനിടെ പാർട്ടിയുടെ ഔദ്യോഗിക അക്കൗണ്ട് ഫെയ്സ്ബുക്കും നീക്കം ചെയ്തു. ഹാഫിസ് സയീദിന്റെയും ജയ്ഷെ മുഹമ്മദ് തലവൻ മൗലാന മസൂദ് അസ്‌ഹറിന്റെയും ഭീകരസംഘടനകളെ പേരെടുത്തു പരാമർശിക്കാതെ മുൻപ്രധാനമന്ത്രി നവാസ് ഷരീഫ് 2018ൽ ഉന്നയിച്ച വിമർശനം വിവാദമായിരുന്നു,
‘അവർ ഭരണകൂടേതര ശക്തികളാണ്. അവരെ അതിർത്തി കടക്കാനും മുംബൈയിൽ 150 ലേറെ പേരെ കൊന്നൊടുക്കാനും നാം അനുവദിക്കാമായിരുന്നോ? എന്തു കൊണ്ടാണ് ആ (മുംബൈ ഭീകരാക്രമണക്കേസ്) വിചാരണ നാം പൂർത്തിയാക്കാത്തത്?’– എന്നായിരുന്നു റാവൽപിണ്ടി ഭീകരവിരുദ്ധ കോടതിയിൽ മുംബൈ ഭീകരാക്രമണക്കേസിന്റെ വിചാരണ മന്ദീഭവിച്ചുകിടക്കുന്നതു പരാമർശിച്ച് നവാസ് പറഞ്ഞത്. ഈ പരാമർശത്തിൽ നിന്നു പിന്നീട് ഇദ്ദേഹം പിന്നോട്ടു പോവുകയും ചെയ്തു. മുംബൈ ഭീകരാക്രമണം സംബന്ധിച്ചു പാക്കിസ്ഥാനിൽ ഇതുവരെ ഒരാളെപ്പോലും ശിക്ഷിച്ചിട്ടില്ല.