നിയമസഭാ തിരഞ്ഞെടുപ്പിലെ വോട്ടെണ്ണൽ ദിനത്തിനു മുൻപുതന്നെ ഫലം പ്രവചിക്കുന്നതിനായി ഹീറോ പ്ലഷർ പ്ലസ് പ്ലാറ്റിനവും മൈഗ്രേഷൻ, വിദേശവിദ്യാഭ്യാസ സ്ഥാപനമായ കാനപ്രൂവുമായി സഹകരിച്ച് മനോരമ ഓൺലൈൻ വായനക്കാർക്കായി സംഘടിപ്പിച്ച പ്രവചന മത്സരത്തിൽ സംസ്ഥാനതലത്തിലെ ഫലം കൃത്യമായി പ്രവചിച്ച വി.എ.അനസ് വിജയി. എൽഡിഎഫ്–99, യുഡിഎഫ്–41, എൻഡിഎ–0, മറ്റുള്ളവർ– 0 എന്ന സീറ്റുനില കൃത്യമായി പ്രവചിച്ച 21 വ്യക്തികളുടെ പേരുകൾ നറുക്കിട്ടാണ് അനസിനെ വിജയിയായി തിരഞ്ഞെടുത്തത്. പത്തനംതിട്ട സീതത്തോട് ആങ്ങാമൂഴി വെള്ളാപ്പള്ളിൽ അനസിന് 25,000 രൂപയാണു സമ്മാനമായി ലഭിക്കുക. മത്സരത്തിൽ ഒന്നര ലക്ഷത്തോളം വായനക്കാരാണു പങ്കെ‌ടുത്തത്. ജില്ലകളിലെ ഫലം ശരിയായി പ്രവചിച്ചവരിൽനിന്നു നറുക്കിട്ടെടുത്ത 14 പേർക്ക് 5000 രൂപ വീതം സമ്മാനവുമുണ്ട്.