കണ്ണൂർ ജില്ലയിലെ പയ്യന്നൂർ ഗ്രാമത്തിൽ നിർമിക്കുന്ന പ്രശസ്ത മോതിരം. ദർഭപ്പുല്ലു കൊണ്ടു നിർമിച്ച മോതിരത്തിലെ പവിത്രക്കെട്ടിന് പകരം സ്വർണം കൊണ്ടുള്ള പവിത്രക്കെട്ടാണു പയ്യന്നൂർ മോതിരത്തിലുള്ളത്. തരണനല്ലൂർ തന്ത്രി പെരുന്തട്ടാനെക്കൊണ്ടു പവിത്രക്കെട്ട് സ്വർണത്തിൽ ചെയ്യിപ്പിച്ചു എന്നാണു വിശ്വാസം. അതാണ് ആദ്യത്തെ പയ്യന്നൂർ പവിത്ര മോതിരം. പഴയ പെരുന്തട്ടാന്റെ പിന്മുറക്കാർ ഇന്നും പയ്യന്നൂരിൽ വ്രതശുദ്ധിയോടെ ഏഴുതരം തൂക്കങ്ങളിൽ പവിത്ര മോതിരം നിർമിക്കുന്നു. 40 ഗ്രാം തൂക്കമുള്ള തികഞ്ഞ പവിത്രമാണ് ഏറ്റവും ഉയർന്നത്. പവിത്രമോതിരത്തിൽ ത്രിമൂർത്തികളുടെ സാന്നിധ്യമുണ്ടെന്നും പവിത്രം ധരിക്കുന്ന കൈകൾക്ക് പാപസ്പർശം ഉണ്ടാകില്ലെന്നുമാണു വിശ്വാസം.

പഴയ കൊച്ചി രാജ്യത്തിലെ ഒരു രാജവംശമായിരുന്നു തലപ്പിള്ളി. ചെങ്ങഴി നമ്പ്യാരായിരുന്നു നാടുവാഴി. ഇവരുടെ ആസ്ഥാനം ചെങ്ങഴിനാട് (ചെങ്ങഴിക്കോട്) എന്നറിയപ്പെട്ടു. ചെങ്ങഴിക്കോട് മാത്രം വിളയുന്ന പ്രത്യേക നേന്ത്രവാഴയുടെ കുലകൾ ശ്രീപത്മനാഭസ്വാമി ക്ഷേത്രത്തിലേക്ക് 12 വർഷം കൂടുമ്പോൾ മുറജപ കാഴ്ചദ്രവ്യമായി കൊണ്ടുപോയിരുന്നു. അതാണു പിന്നീട് ചെങ്ങാലിക്കോടനായത്. ഉരുണ്ട ആകൃതിയും സ്വർണനിറവുമുള്ള തൃശൂരിന്റെ സ്വന്തം നേന്ത്രവാഴയിനം. ഓണത്തിനു ഗുരുവായൂർ ക്ഷേത്രത്തിൽ കാഴ്ചക്കുലയായി സമർപ്പിക്കുന്നതും ചെങ്ങാലിക്കോടൻ തന്നെ. ജില്ലയിലെ എരുമപ്പെട്ടിക്കടുത്തുള്ള കരിയന്നൂരാണു ജന്മദേശം. നീണ്ടുരുണ്ട ആകൃതി, ആനക്കൊമ്പിനോടു സാദൃശ്യമുള്ള വളവ്, മൃദുവും നല്ല മധുരമുള്ളതുമായ കാമ്പ്, കനം കുറഞ്ഞ തൊലി, തൊലിയിലെ ചുവന്ന നിറം (കര), പുഴുങ്ങിയെടുത്താൽ വെണ്ണ പോലിരിക്കും എന്നിവയാണു സവിശേഷതകൾ.

ഏലം വ്യാപകമായി വിളയുന്ന മണ്ണല്ല ആലപ്പുഴയുടേത്. പക്ഷേ പഴയ തിരുവിതാംകൂർ പ്രദേശത്തു വിളഞ്ഞിരുന്ന പ്രത്യേകതരം ഏലം ആലപ്പുഴ തുറമുഖം വഴി വിദേശത്തേക്കു കയറ്റി അയച്ചിരുന്നു. കായകളുടെ വലുപ്പം കൊണ്ടും നറുമണം കൊണ്ടും വശ്യമായ പച്ചനിറം കൊണ്ടും അനുഗൃഹീതമായിരുന്നു അത്; രാജ്യാന്തര വ്യാപാരരംഗത്ത് ഏറ്റവും പ്രിയപ്പെട്ട ഗ്രേഡ്. സുഗന്ധം നൽകുന്ന രാസഘടകങ്ങൾ കൂടുതലുണ്ട്. ആലപ്പുഴ തുറമുഖം വഴി വൻതോതിൽ കയറ്റുമതി ചെയ്തിരുന്നതിനാൽ ‘ആലപ്പി ഗ്രീൻ കാർഡമം’ എന്ന വ്യാപാരനാമത്തിൽ ലോകപ്രശസ്തമായി.

പത്തനംതിട്ട ജില്ലയിലെ ആറന്മുളയിൽ ഉണ്ടാക്കി ലോകശ്രദ്ധ പിടിച്ചുപറ്റിയ ഉൽപന്നം. ചെമ്പും വെളുത്തീയവും പ്രത്യേക അനുപാതത്തിൽ ചേർത്ത് ഉണ്ടാക്കുന്ന കൂട്ടുലോഹമാണു കണ്ണാടി നിർമാണത്തിന് ഉപയോഗിക്കുന്നത്. ഇതിലെ വെളുത്തീയത്തിന്റെ അളവ് സാധാരണ ഓട്ടുപാത്ര നിർമാണത്തിന് ഉപയോഗിക്കുന്നതിന്റെ ഒന്നര മടങ്ങാണ്. ഓട്ടുപാത്ര നിർമാണംപോലെ തന്നെ കരുവാക്കി മൂശയിൽ വാർത്തെടുക്കുന്ന രീതിയാണ് ആറന്മുള കണ്ണാടിയുടേതും. മൂശയിൽനിന്നു പുറത്തെടുത്ത് കണ്ണാടി ഫലകത്തിൽ ഉമിയും മരോട്ടി എണ്ണയും ചേർത്ത മിശ്രിതം ഉപയോഗിച്ച് മിനുക്കുപണി നടത്തും. ഇത് പിത്തളക്കൂട്ടിൽ ഉറപ്പിച്ചാണ് ഉപയോഗിക്കുക. സാധാരണ കണ്ണാടികളിൽ പ്രതിബിംബം ഗ്ലാസിനു പിറകിലെ രസപാളിയിലാണു രൂപപ്പെടുന്നത്. അതിനാൽ പ്രതിബിംബത്തിനു വ്യതിയാനം സംഭവിക്കും. ആറന്മുള കണ്ണാടിയുടെ പ്രതലത്തിൽ പ്രതിബിംബം രൂപപ്പെടുന്നതിനാൽ ഇത് യഥാർഥ വസ്തുവിന്റെ രൂപത്തോടു പൂർണമായ സാമ്യം പുലർത്തും.

ഇന്ത്യയിൽ കൈതച്ചക്കയുടെ ഏറ്റവും വലിയ ഉൽപാദന കേന്ദ്രമാണ് എറണാകുളം ജില്ലയിലെ മൂവാറ്റുപുഴയ്ക്കടുത്തുള്ള വാഴക്കുളം. 1945 മുതൽ ഇവിടെ കൈതച്ചക്ക മുഖ്യവിളയായിരുന്നു. പിന്നീടു സമീപഗ്രാമങ്ങളിലേക്കു കൃഷി വ്യാപിച്ചു. ഇപ്പോൾ പത്തനംതിട്ട, കോട്ടയം, കോഴിക്കോട് ജില്ലകളിലും വിളയുന്നു. നാടൻ ഭാഷയിൽ കന്നാര എന്നു വിളിക്കുന്ന മൗറീഷ്യസ് ഇനത്തിൽ പെട്ട കൈതച്ചക്കയാണു വാഴക്കുളം പൈനാപ്പിൾ എന്ന പേരിൽ പ്രശസ്തമായത്. ആകർഷകമായ മണവും സ്വർണ നിറവും രുചിയും മാധുര്യവും സവിശേഷതകൾ. ധാരാളം പഞ്ചസാരയും കരോട്ടിനും വൈറ്റമിനുകളും മിനറലുകളും അടങ്ങിയിരിക്കുന്നു.

ഔഷധഗുണമുള്ള നവര അരിക്കു രോഗികളുടെയും കുഞ്ഞുങ്ങളുടെയും ഭക്ഷണത്തിൽ പ്രത്യേക സ്ഥാനമുണ്ട്. കർക്കടകക്കഞ്ഞിയിൽ നവരയരിയാണ് ചേർക്കുന്നത്. കേന്ദ്ര നാഡീവ്യൂഹത്തിന്റെ വളർച്ചയ്ക്കും ബലത്തിനും പക്ഷാഘാതം, വാതം, തുടങ്ങിയവയ്ക്കും ആയുർവേദത്തിലെ പ്രധാന മരുന്നുകൂടിയാണ് നവര. കിഴിക്കും ഉഴിച്ചിലിനും ഉപയോഗിക്കുന്നു. കേരളത്തിൽ മിക്ക സ്ഥലങ്ങളിലും നവര കൃഷി ചെയ്യുന്നുണ്ട്. മഞ്ഞനിറത്തിലും കറുപ്പുനിറത്തിലും ഉള്ള ഉമിയോടുകൂടിയ നവര ഉണ്ട്. ഞവര, നവിര, ഞവിര, നമര, നകര, നകരപുഞ്ച എന്നീ പേരുകളിലും അറിയപ്പെടുന്നു.

വയനാട്ടിൽ മാത്രം വിളയുന്ന സുഗന്ധ നെല്ലിനങ്ങളാണിവ. തണുപ്പിൽ വളരുന്നതിനാൽ വശ്യമായ സുഗന്ധമാണ്. ഉയരം കൂടിയതും തീരെക്കുറവ് പ്രകാശം ആവശ്യമുള്ളതുമാണു ജീരകശാല ഇനം. ജീരകത്തിന്റെ വലുപ്പത്തിൽ മെലിഞ്ഞു നീണ്ട നെല്ലാണിത്. ബിരിയാണി, നെയ്ച്ചോറ് തുടങ്ങിയ വിഭവങ്ങൾക്കാണു പ്രധാനമായി ഉപയോഗിക്കുന്നത്. തിളങ്ങുന്ന വയ്ക്കോൽ നിറമുള്ള ചെറിയ ഉരുണ്ട നെന്മണികളാണു ഗന്ധകശാല ഇനത്തിന്. ചെടി നാലടിയോളം ഉയരത്തിൽ വളരും. അരിക്ക് ചന്ദനത്തിന്റെ സുഗന്ധമുണ്ടാകും. വയനാട്ടിലെ ചേകാടി, തിരുനെല്ലി ഭാഗങ്ങളിലാണ് കൃഷി കൂടുതൽ. മറ്റു നെല്ലിനങ്ങളെ അപേക്ഷിച്ച് പകുതിയോളമേ വിളവ് ലഭിക്കൂ.

കൈത, ആറ്റുകൈത എന്നൊക്കെ അറിയപ്പെടുന്ന തഴച്ചെടിയുടെ ഇല(ഓല) മുള്ളുകൾ ചീകിക്കളഞ്ഞശേഷം പുഴുങ്ങി ഉണക്കി കീറിയെടുത്താണ് താഴപ്പായ നെയ്യുക. പാൻഡാനേഡി വംശത്തിൽപ്പെടുന്ന തഴയുടെ തടിക്ക് ബലം കുറവാണ്. ചില ശാഖകളുണ്ടാകും. നേർത്തതും നീണ്ടതുമായ ഇലകൾ തടിയുടെ അഗ്രഭാഗത്ത് കൂട്ടംകൂടി നിൽക്കും. തഴപ്പായ നിർമാണത്തിനു കീർത്തികേട്ട ഗ്രാമമാണു കൊല്ലം ജില്ലയിലെ കരുനാഗപ്പള്ളിക്കടുത്തുള്ള തഴവ.

രാജ്യത്ത് ഭൗമസൂചിക പദവി ലഭിച്ച ആദ്യ വനവിഭവം. മലപ്പുറം ജില്ലയിലെ ചാലിയാറിന്റെ തീരത്തെ എക്കൽ കലർന്ന മണ്ണും കാലാവസ്ഥയും തേക്ക് കൃഷിക്ക് യോജ്യമാണെന്ന് 1840കളിൽ ബ്രിട്ടിഷുകാരാണു തിരിച്ചറിഞ്ഞത്. നിലമ്പൂരിലെ ഇലപൊഴിയുംകാടുകളിൽ അവർ തേക്കുമരങ്ങൾ നട്ടുപിടിപ്പിച്ചു. സ്വാഭാവിക വനങ്ങളിൽനിന്നു ശേഖരിച്ച വിത്ത് ഉപയോഗിച്ചായിരുന്നു തൈ ഉൽപാദനം. അങ്ങനെ 1846ൽ നിലമ്പൂരിൽ ലോകത്തെ ആദ്യ മനുഷ്യ നിർമിത തേക്ക് തോട്ടം പിറവിയെടുത്തു. സ്വർണനിറവും കൂടുതൽ വ്യക്തതയുള്ള വാർഷിക വളയങ്ങളും നിലമ്പൂർ തേക്കിന്റെ (മലബാർ തേക്ക്) പ്രത്യേകതകളാണ്. എണ്ണയുടെ (ടെക്ടോമിൻ) അംശവും കൂടുതൽ. ചിതലിനെ ചെറുക്കുന്നതിനും ദീർഘകാലം ഉപ്പു വെള്ളത്തിൽ കിടന്നാലും കേടുവരാതിരിക്കുന്നതിനും ഇതു കാരണമാകുന്നു.

പമ്പ, മണിമല, അച്ചൻകോവിൽ, മീനച്ചിൽ പുഴകളുടെ തീരത്തു വിളയുന്ന കരിമ്പിൽ നിന്നാണ് മധ്യതിരുവിതാംകൂർ ശർക്കര അഥവാ പതിയൻ ശർക്കര ഉണ്ടാക്കുന്നത്. തിരുവൻവണ്ടൂർ, പാണ്ടനാട് പഞ്ചായത്തുകൾ േകന്ദ്രീകരിച്ചാണു ശർക്കരയുടെ പ്രധാന ഉൽപാദനം. ഔഷധ ഗുണം ഉള്ളതിനാൽ ആയുർവേദ മരുന്നുകൾക്കും ഉപയോഗിക്കുന്നു. രാസവസ്തുക്കൾ ചേർക്കാതെ ജൈവരീതിയിലാണു നിർമാണം. സാധാരണ ശർക്കരയെക്കാൾ അയഞ്ഞ രൂപത്തിലാണ് പതിയൻ ശർക്കര. ഏലം, ജീരകം തുടങ്ങിയവ ചേർത്ത‍ാണ് ശർക്കര ഉണ്ടയാക്കുന്നത്. കരിമ്പ് നീരിലെ അഴുക്കു മാറിക്കിട്ടാനായി നീറ്റുകക്കയും വെണ്ടയുടെ നീരും ചേർക്കും. ഉണ്ടശർക്കര, തരിശർക്കര, പാനി എന്നീ രൂപങ്ങളിൽ ലഭിക്കും. ഉപ്പുരസമില്ലാത്ത മാധുര്യവും മനം മയക്കുന്ന മണവും സ്വർണ ശോഭകലർന്ന തവിട്ടുനിറവും ക്രിസ്റ്റൽ രൂപത്തിലുള്ള പഞ്ചസാരയും ഉയർന്നതോതിലുള്ള കാത്സ്യവും സവിശേഷതകൾ.

വർഷം മുഴുവൻ കരിമ്പ് കൃഷി നടക്കുന്നതാണ് മറയൂരിലെ കാന്തല്ലൂർ പ്രദേശം. ഏതുസമയത്തും ഇവിടെനിന്നു ശർക്കര ലഭിക്കും. കടും തവിട്ടു നിറത്തിലുള്ള മറയൂർ ശർക്കരയ്ക്ക് ഉപ്പുരസം തീരെയില്ല. ഇരുമ്പ്, കാൽസ്യം എന്നിവ കൂടുതലും സോഡിയം സാന്നിധ്യം കുറവുമാണ്. ശുദ്ധമായ മറയൂർ ശർക്കരയുടെ നിറം കറുപ്പാണ്. ഇതിനാലാണു വിദേശത്തു പലയിടത്തും ബ്ലാക്ക് ജാഗ്രി എന്ന പേര്. കൈകൊണ്ട് ഉരുട്ടിയെടുക്കുന്നതിനാൽ ശർക്കരകളിൽ കൈപ്പാട് തെളി‍ഞ്ഞു കാണാം. കരിമ്പിൻ നീര്, കാത്സ്യം എന്നിവയും കരട് നീക്കുവാനായി സോഡിയം ബൈകാർബണേറ്റുമാണ് മറയൂരിലെ ശർക്കരയുടെ പ്രധാന ചേരുവകകൾ. മറയൂരിലെ കരിമ്പ് കർഷകർ പരമ്പരാഗതമായി നിർമിക്കുന്ന തരത്തിലുള്ള അച്ചുവെല്ലമാണു കയറ്റുമതി ചെയ്യുന്നത്. മരംകൊണ്ട് നിർമിച്ച പ്രത്യേക അച്ചിൽ വാർത്തെടുക്കുന്നതാണ് അച്ചുവെല്ലം.

തൃശൂർ–പാലക്കാട് അതിർത്തിയിൽ ഭാരതപ്പുഴയുടെ തീരത്താണു കുത്താമ്പുള്ളി നെയ്ത്തുഗ്രാമം. കുത്താമ്പുള്ളി സാരികൾ പ്രധാനമായും നെയ്തെടുക്കുന്നത് പഴയ മൈസൂർ സംസ്ഥാനത്ത് വേരുകളുള്ള നെയ്ത്തുകുലമായ ദേവാംഗ സമുദായത്തിൽപെട്ടവരാണ്. 400 വർഷംമുൻപു കൊച്ചി രാജകുടുംബത്തിനു വസ്ത്രം നെയ്യാനായി മഹാരാജാവിന്റെ പ്രത്യേക ക്ഷണപ്രകാരം എത്തി ഇവിടെ താമസമാക്കിയ ദേവാംഗരുടെ പിൻമുറക്കാരായ അഞ്ഞൂറോളം കുടുംബങ്ങളാണ് ഇപ്പോൾ കുത്താമ്പുള്ളി സാരികൾ നെയ്യുന്നത്.

നെയ്ത്തിൽ പ്രത്യേക പ്രാവീണ്യമുള്ളവരാണു തമിഴ്നാട്ടിലെ വള്ളിയൂരിലുള്ള ശാലിഗോത്രക്കാർ. ഇവരിൽ 10 കുടുംബങ്ങളെ രാജകൊട്ടാരത്തിലേക്ക് ആവശ്യമുള്ള കസവ് തുണിത്തരങ്ങൾ നെയ്യാൻ തിരുവിതാംകൂർ മഹാരാജാവ് ബാലരാമവർമ കേരളത്തിലേക്കു കൊണ്ടുവന്നു. നെയ്യാറ്റിൻകരയ്ക്കു സമീപമുള്ള അന്തിക്കാട്ട് ഇവർക്കു താമസസൗകര്യമൊരുക്കി. മഹാരാജാവിന്റെ മരണശേഷം അദ്ദേഹത്തിന്റെ സ്മരണാർഥം അന്തിക്കാട് ബാലരാമപുരം എന്നറിയപ്പെട്ടു. ശാലിഗോത്രക്കാർ നെയ്യുന്ന വസ്ത്രങ്ങൾ ബാലരാമപുരം കൈത്തറി എന്നും. പ്രത്യേകം പരുവപ്പെടുത്തിയെടുക്കുന്ന ഗുണനിലവാരമേറിയ നൂലാണ് നെയ്ത്തിനായി ഉപയോഗിക്കുന്നത്. കഴിനൂൽ കോർത്തുകെട്ടി ചവിട്ടി നനച്ച് പാകപ്പെടുത്തി നാരാക്കി റാട്ടിൽ ചുറ്റി പാവാക്കുന്നു. ഇതിനെ പാക്കളങ്ങളിൽ അരിപ്പശ തേച്ച്, തേങ്ങയെണ്ണ തടവി, വെയിലും മഴയുമേൽക്കാതെ ഉണക്കിയെടുത്താണ് നെയ്ത്തുശാലകളിൽ എത്തിക്കുന്നത്. ഈ പാവിൽ നെയ്തെടുക്കുന്ന വസ്ത്രങ്ങളാണ് ബാലരാമപുരം കൈത്തറിയെ വ്യത്യസ്തമാക്കുന്നത്.

കൊച്ചി രാജ്യത്തിന്റെ മന്ത്രിസ്ഥാനം വഹിച്ചിരുന്ന പാലിയത്തച്ഛന്മാരുടെ ആസ്ഥാനമായിരുന്നു ചേന്ദമംഗലം. ആന്ധ്രാപ്രദേശിൽ നിന്നു മുണ്ടു വിൽക്കാൻ വന്ന നെയ്ത്തുകാരന്റെ കഴിവിൽ ആകൃഷ്ടനായ പാലിയത്തച്‌ഛൻ അദ്ദേഹത്തെ ചേന്ദമംഗലത്തു പാർപ്പിക്കുകയും അയാൾ നാട്ടുകാരെ നെയ്ത്തുകല പഠിപ്പിക്കുകയുമായിരുന്നു. തമിഴ്നാട്ടിൽ നിന്നും ആന്ധ്രയിൽ നിന്നും കൊണ്ടുവന്ന തറികളായിരുന്നു ആദ്യകാലത്ത് ഉപയോഗിച്ചിരുന്നത്. പിന്നീടു തദ്ദേശീയമായി തറികൾ നിർമിച്ചെടുത്തു. മേൽത്തരം പരുത്തിനൂലുകൾ കൊണ്ടു നെയ്തെടുത്ത കൈത്തറി വസ്ത്രങ്ങൾ പിന്നീടു നാടിന്റെ മുഖമുദ്രയായി മാറി. കൈത്തറി വിപണിയിൽ കൊച്ചിയുടെ ബ്രാൻഡാണ് ചേന്ദമംഗലം കൈത്തറി.

1938-ൽ സ്ഥാപിതമായ കാസർകോട് നെയ്ത്തു സഹകരണ സംഘത്തിലൂടെ പ്രചാരം ലഭിച്ച സാരി. സംഘം പേരൊന്നും നൽകിയില്ലെങ്കിലും ഇടപാടുകാർ അതിനെ കാസർകോട് സാരിയെന്നു വിശേഷിപ്പിച്ചു. ഈ പേരിൽ ഇന്ത്യയ്ക്കകത്തും പുറത്തും വൻ സ്വീകാര്യത ലഭിച്ചു. അലക്കുന്തോറും ശോഭയേറുന്നതും ചുരുങ്ങാത്തതുമായ സാരി കർണാടക വസ്ത്ര പാരമ്പര്യശൈലിയിൽ നിന്നു തുടങ്ങിയതാണെങ്കിലും ഇപ്പോൾ പൂർണമായും കേരളീയ ശൈലിയിലായി. കണ്ണൂർ കൈത്തറി ഉൽപന്നങ്ങൾക്കും ഭൗമസൂചിക പദവി ലഭിച്ചിട്ടുണ്ട്.

എറണാകുളം, ആലപ്പുഴ ജില്ലകളിൽ മുഖ്യമായും തൃശൂർ ജില്ലയുടെ കുറച്ചുഭാഗങ്ങളിലും തീരദേശത്ത് ഉപ്പുവെള്ളം കയറുന്ന പാടങ്ങളിൽ ജൈവരീതിയിൽ വിളയുന്നതാണ് പൊക്കാളി നെല്ല്. പൊക്കാളിയെന്നാൽ പൊക്കത്തിൽ ആളുന്നത് എന്നർഥം. കാലവർഷാരംഭത്തോടെ കൃഷി തുടങ്ങുന്ന പാടങ്ങളിൽ കൊയ്യാൻ പാകമാകുമ്പോൾ കതിരുകൾ മാത്രം മുറിച്ചെടുക്കും. വൈക്കോൽ പാടങ്ങളിൽ ഉപേക്ഷിക്കും. ഈ പാടങ്ങളിൽ പിന്നീട് ചെമ്മീൻ കൃഷി നടത്തും. ആറടിയോളം ഉയരത്തിൽ വളരുന്ന ഈയിനം നെല്ല് ഉയർന്ന പ്രതിരോധ ശേഷിയുള്ളതും പോഷകമൂല്യമടങ്ങിയതുമാണ്. ഉപ്പുവെള്ളത്തെ പ്രതിരോധിക്കാനുള്ള കഴിവ് ലോകപ്രശസ്തം. ചൂട്ടുപൊക്കാളി, ചെട്ടിവിരിപ്പ്, ഓർപാണ്ടി, ചെറുവിരിപ്പ്, കുറുവ, ആനക്കോടൻ, എരവപ്പാണ്ടി എന്നിവയാണ് പരമ്പരാഗത വിത്തുകൾ.

കോഴിക്കോട്, കണ്ണൂർ, കാസർകോട് ജില്ലകളിൽ ഉപ്പുവെള്ളം കയറുന്ന തീരദേശ നെൽപാടങ്ങളിൽ ജൈവരീതിയിൽ വിളയുന്ന അരിയാണ് കൈപ്പാട് അരി. കായൽപാടം എന്ന പദം ലോപിച്ചാണ് കൈപ്പാട് എന്ന പേര് വന്നതത്രെ. കുതിര്, ഓർക്കയമ, ഓർപാണ്ടി, കണ്ടോർകുട്ടി, മുണ്ടോൻ, ഒടിയൻ, ഏഴോം–1, ഏഴോം–2 എന്നിങ്ങനെയുള്ള കൈപ്പാടുവിത്തുകളുടെ ചോറിന് സ്വാദേറും. ഇരുമ്പ്, കാത്സ്യം, നാകം, മഗ്നീഷ്യം എന്നീ മൂലകങ്ങൾ ധാരാളമുണ്ട്.

കേരളത്തിന്റെ നെല്ലറയായ പാലക്കാടിന്റെ വയലേലകളിൽ വിളയുന്ന പരമ്പരാഗത മട്ട ഇനങ്ങളുടെ അരിയാണ് മട്ട. തവളക്കണ്ണൻ, ചെങ്കഴമ, ആര്യൻ, തെക്കൻ, ചീര, ഇലപ്പപ്പൂചമ്പാൻ, ചിറ്റേനി, ഇരവപ്പാണ്ടി, ചെറിയ ആര്യൻ, വലിയ ചമ്പാൻ, ചുവന്ന മോടൻ, കുഞ്ഞുകുഞ്ഞ്, ജ്യോതി എന്നിവയാണ് ഇനങ്ങൾ. പാലക്കാടിന്റെ തനതുകാലാവസ്ഥയും പാലക്കാടൻ വയലുകളുടെ സവിശേഷതകളും പരമ്പരാഗത കൃഷിമുറകളും നാടൻ ഇനങ്ങളുടെ ജനിതകഗുണങ്ങളും മട്ട അരിയെ സവിശേഷമാക്കുന്നു. കൃഷിക്കാരുടെ കൂട്ടായ്മയായ പാലക്കാടൻ മട്ട ഫാർമേഴ്സ് പ്രൊഡ്യൂസർ കമ്പനിയുടെ പേരിലായിരുന്നു അരിക്കു ഭൗമസൂചിക പദവി ലഭിച്ചത്. രാജ്യത്ത് ആദ്യമായാണ് ഒരു ഉൽപന്നത്തിനുള്ള ഭൗമസൂചിക പദവി കർഷകരുടെ സംഘത്തിനു ലഭിക്കുന്നത്.

ആലപ്പുഴ ഓണാട്ടുകരയിലെ മാവേലിക്കര, കാർത്തികപ്പള്ളി, കുന്നത്തൂർ, കരുനാഗപ്പള്ളി താലൂക്കുകളിലെ മണൽ നിലങ്ങളിലാണ് ഓണാട്ടുകര എള്ളിന്റെ ഉൽപാദനം. സാധാരണ എള്ളിനെക്കാൾ ഔഷധ ഗുണമുണ്ട്. ‘ആയാളി’ ഇനത്തിൽപ്പെട്ട വിത്തിനമാണ് എള്ളു കൃഷിക്കായി ഉപയോഗിക്കുന്നത്. സെസാമം ഇൻഡിക്കം എന്ന ശാസ്ത്രീയ നാമത്തിൽ അറിയപ്പെടുന്ന എള്ളുവിത്തിൽ 50% എണ്ണയാണ്. പ്രോട്ടീൻ, കാത്സ്യം, ഫോസ്‌ഫറസ് തുടങ്ങിയവയും അടങ്ങിയിട്ടുണ്ട്.

ലോകത്തിലെ ഏറ്റവും പ്രശസ്തമായ സുഗന്ധവിളയായ കുരുമുളകിന്റെ ഏറ്റവും കേമപ്പെട്ട ബ്രാൻഡ്. വാസ്‌കോഡഗാമയെ കൊതിപ്പിച്ചത് ഈ കുരുമുളക് ഇനമാണ്. മണവും രുചിയും വീര്യവും ഏറും, മലബാർ കുരുമുളകിന്.

മലപ്പുറം ജില്ലയിൽ തിരൂർ, താനൂർ, തിരൂരങ്ങാടി, കുറ്റിപ്പുറം, വേങ്ങര പ്രദേശങ്ങളിൽ കൃഷി ചെയ്യുന്ന സവിശേഷ തരം വെറ്റില. ഇരുണ്ട പച്ചനിറവും വലിപ്പവുമുള്ള ലങ്കാ പാൻ എന്ന കണ്ണിവെറ്റിലയുൾപ്പെടെ പാക്കിസ്ഥാനിലെ മുറുക്കുകാരുടെ വരെ മനം കവരുന്നതാണു തിരൂർ വെറ്റിലയിനങ്ങൾ. രാജസ്‌ഥാൻ, ഉത്തർപ്രദേശ്, മധ്യപ്രദേശ്, ന്യൂഡൽഹി എന്നിവിടങ്ങളിലും ഇതിന് ആവശ്യക്കാരേറെ. നാലും കൂട്ടി മുറുക്കാനുപയോഗിക്കുന്നതിലുപരി, വായ്‌നാറ്റത്തിനും ദഹനപ്രശ്നങ്ങൾക്കുമുള്ള മരുന്നായും തിരൂർ വെറ്റില ഉപയോഗിച്ചുവരുന്നു. തുലാ മാസത്തിലും ഇടവ മാസത്തിലുമായി കൃഷി ചെയ്യുന്ന തിരൂർ വെറ്റില തുലാക്കൊടി, ഇടവക്കൊടിയെന്നാണറിയപ്പെടുന്നത്.

രാജ്യാന്തര വിപണിയിൽ ആവശ്യക്കാരേറെയുള്ള കാപ്പി ഇനം. തണൽ മരങ്ങൾക്കിടയിലാണ് കൃഷി. റോബസ്റ്റ ഉൽപാദനത്തിനു വേണ്ടി മാത്രമായി പരമ്പരാഗത കൃഷിരീതിയുമുണ്ട്. മൺസൂൺഡ് മലബാർ റോബസ്റ്റ കാപ്പിക്കും മൺസൂൺഡ് മലബാർ അറബിക്ക കാപ്പിക്കും ഭൗമസൂചിക പദവി ലഭിച്ചിട്ടുണ്ട്.

ചെമ്പകം, കരിങ്ങാലി മരം, പ്ലാവ് എന്നിവ കൊണ്ട് നിർമിക്കുന്ന വാദ്യോപകരണം. ഒന്നര നൂറ്റാണ്ടായി പാലക്കാട്ടെ ചില കുടുംബങ്ങളിൽ പരമ്പരാഗതമായി നിർമിക്കുന്നു. വ്യത്യസ്തമായ സ്വരങ്ങളാണ് ഉപകരണത്തിന്റെ ഇരുവശത്തുനിന്നും കേൾക്കാനാവുക. പോത്തിൻ തോല്‍ പൊതിഞ്ഞാണു മദ്ദളം സംരക്ഷിക്കുന്നത്.

ആലപ്പുഴയിലെ കായലുകളിൽ തൊണ്ട് അഴുക്കി, തല്ലി, പിരിച്ച് കയറാക്കിയെടുക്കുമ്പോൾ അതിനു കരുത്തും അഴകും കൂടുതലായിരുന്നു. ആലപ്പുഴയിൽ നിന്നുള്ള കയറിന് അങ്ങനെയാണ് ഭൗമസൂചികയിൽ ഇടം ലഭിച്ചത്. പരമ്പരാഗത കയറുൽപാദനം കുറഞ്ഞെങ്കിലും ഇന്നും ആലപ്പുഴ കയറിനു വിദേശങ്ങളിലുൾപ്പെടെ ആവശ്യക്കാരുണ്ട്.

ചിരട്ടയിൽ കൗതുക വസ്തുക്കൾ നിർമിക്കുന്ന രീതി ഇന്ത്യയിൽ പലയിടത്തുമുണ്ടെങ്കിലും വെങ്കലം വിളക്കിച്ചേർത്ത് ചിരട്ടയിൽ പലതരത്തിലുള്ള കൗതുക വസ്തുക്കൾ നിർമിക്കുന്നത് കേരളത്തിൽ മാത്രമാണ്. തിരുവനന്തപുരത്തും കോഴിക്കോടുമാണു നിർമാണത്തിലേറെയും. കപ്പും പൂപ്പാത്രങ്ങളും വിവിധയിനം പെട്ടികളും സ്പൂണുകളുമെല്ലാം ഇത്തരത്തിൽ നിർമിക്കുന്നു.