ജനുവരി 30ന് ആദ്യ കേസ് റിപ്പോർട്ട് ചെയ്ത് 110–ാം ദിവസം, മേയ് 8ന്, ഇന്ത്യയിലെ രോഗികളുടെ എണ്ണം ഒരു ലക്ഷം കടന്നിരുന്നു. ഇന്ത്യയിൽ ഇതുവരെ ഒരു ലക്ഷം കോവിഡ് ബാധിതർ ക‌ടന്ന സംസ്ഥാനങ്ങളിൽ ഏറ്റവും കൂടുതൽ സമയമെടുത്ത് ആ സംഖ്യയിലെത്തിയത് കേരളമാണ്–226 ദിവസം. ഏറ്റവും പെട്ടെന്ന് രോഗികൾ ഒരു ലക്ഷത്തിലെത്തിയത് മഹാരാഷ്ട്രയിലാണ്; മാർച്ച് 9ന് ആദ്യ കേസ് റിപ്പോർട്ട് ചെയ്ത് 96–ാം ദിവസം, ജൂൺ 12ന്. നിലവിൽ കേരളത്തിലെ കോവിഡ് ബാധിതരുടെ എണ്ണം അതിവേഗം വർധിക്കുന്നതായാണ് കണക്കുകൾ. അതിൽത്തന്നെ സമ്പർക്ക ബാധിതരുടെ എണ്ണം വർധിക്കുന്നതും ആശങ്കപ്പെടുത്തുന്നു.